Iwit ug kinagamyan
Nahadlok kong mangiwit na sab ang Sugbo ug Central Visayas. Sa pagtubag sa dinaliang panginahanglan sa pagpasaka sa minimum nga suholan. Giaprobahan na sa wage board sa Metro Manila ang P40 nga uminto. Gipaabot nga mosunod ang ubang rehiyon. Way timaan nga nag-apura ang wage board sa atong rehiyon.
Gawas nga langayan, gikaintapan sab ang atong wage board nga maoy labing tihik. Nasaksihan sa nangaging katuigan nga ang atong rehiyon, nga mao untay labing malambuon gawas sa Luzon, maoy usa sa kinaubsan og uminto sa atong mga anak sa singot.
* **
Hunyo 14 pa sa niaging tuig nga gi-umentohan ang inadlawng minimum nga suweldo sa Sugbo ug Central Visayas ngadto sa P435. Sa ato pa, base sa balaod nga kausa ra ma-umintohan ang suholan kada tuig, sa niaging buwan ra unta angay’ng gipatuman ang bag-ong uminto.
Kon makiangayon pa ang wage boards, base sa samang balaod nga nagtugot sa mas sayo nga uminto kon dunay dakong panginahanglan, gi-umintohan na unta ang suholan niadto pang Enero, kanus-a nisulbong ang inflation rate ngadto sa 8.7%, ang kinatas-an sukad sa Nobyembre 2008.
* * *
Salamat sa katihik ug katapolan nga nahisgutan na sa ibabaw, naunhan na sab ta sa Metro Manila. Kansang mga trabahante magdawat na og P610 nga minimum nga suweldo sugod sa sunod buwan.
Sa ato pa, labaw na sila og P175. Makapalit nag kapin sa tulo ka kilong bugas humay. Makabayad nag tulo ka kaon sa tag kapin P50 kada kaon. Kapanalipdan lang sa gobyerno kining dakong inhustisya kon mapruybahan nga aluminum ang atong tiyan maong dugayng gutmon.
* * *
Human sa paukyab sa Kongreso sa P150 nga legislated wage increase, wa nay ek ang mga kongresista ug mga senador. Giuna hinuon ang Maharlika Investment Fund bill bisan naghibat ang mga probisyon.
Magpabiling biktima ang mga mamumuo sa surambaw nga botasyon sa wage boards. Ang duha ka representate sa gobiyerno (sa Department of Trade and Industry ug National Economic and Development Authority) makigkonsabo sa duha ka representante sa management. Maong kanunayng pilde ang duha ka representante sa labor. Ug, bisan pipila nila kada adlaw mosimba, kanunayng itlog ang tubag sa mga negosyante sa bisan unsang petisyon sa uminto.
* * *
- Latest
