EDITORYAL - Pagpalambo sa Carbon Market

Dili parehas ang kasinatian sa mga vendors sa Carbon Public Market sa Cebu City kabahin aning mga kausaban nga gihimo sa siyudad sa tinguha nga hapsay, mahan-ay ug limpyo para sa tanan.

Sugod sa paglingkod ni Cebu City Mayor Michael Rama gisugdan ang pagpanindot sa maong merkado.

Ang Carbon Public Market maoy makonsiderar nga kinadak-ang merkado sa tibuok sa Sugbu, anhi mapalit ang kadaghanan sa batakang panginahanglanon sa mga tawo gikan sa pagkaon hangtud sa mga galamiton sa ilang mga trabaho.

Apan dunay mga vendors nga wala mahimuot sa mga kausaban kay naapektahan ang ilang halin, samtang ang uban nalipay kay mas nidako silang halin.

Tingali wala lang ni matan-aw og maayo sa mga kadagkoan sa city hall, nga duna gyuy mga vendors nga maapektahan sa ilang pagabuhatong kausaban.

Tinuod naa gyuy mabulahan kay mapabor kanila ang mga pumapalit, apan duna gyuy uban nga gilangaw kay dili halos makaduol ang mga tawo sa ilang pwesto.

Ang mga nagreklamo mao ang mga vendors nga naanad nga dunay mga sakyanan nga makasud duol sa ilang nahimutangan. Kay ang mamalitay nga de sakyanan maglisod man sab pangita og maparkingan.

Natural ang mga tawo nga dunay sakyanan nga bulto-bulto kun mangompra mabag-ohan gyud sa sitwasyon, ang uban anha nalang mamalit kun asa pabor ilang sakyanan, ang kadtong toa sa tumoy nga mga vendors dili na mahalinan.

Tingali sab, nabag-ohan ra ang tanan, ang vendors ug ang mismong mga pumapalit, kinahanglan lang una nga maanad ang tanan sa bag-ong sistema.

Apan kining dili parehas nga feedback sa mga vendors kinahanglan nga kini isipong pagtulon-an para sa mga gitahasan sa paghimo og mga kausaban alang sa kalamboan sa maong merkado.

Kinahanglang patas nila kining tan-awon ug pangitaan og solusyon inay nga sawayon lang diretso kadtong mga mireklamo.