Pananghid-pahibalo importante

Ang panimalay nga nagminahalay dili lang magpinarayganay. Magpananghiray usab.   

May amahan nga kada gabii sa dili pa matulog, iphon gyod ilang mga anak kon kompleto pa ba, nakauli na ba tanan gikan sa ilang eskuylahan o trabahoan. Sa higayon nga adunay makulang nga usa, dili gyod siya matulog hangtod dili kini maabot. 

May usa ka gabii nga wala mouli ilang anak nga lalaki. Lakip iyang misis ug tanang miyembro sa pamilya wala masayod asa kini paingon kay walay bisan usa kanila ang gipananghiran. Gisulayan nilag text ug tawag sa selpon. Pastilan, cannot be reached. Hala, sila tanan, gikuyawan na!

Maayo gani, kay pagkabuntag sayo, may sakyanan nga mihunong tungod sa ilang balay nga ang sakay ilang anak. Paghitangka pa lang niini sa sala, nangayo dayon kinig ‘sorry’ nilang mga ginikanan. Unya mitug-an nga giimbitar diay siyag birthday party sa erpat sa iyang uyab. Ug kay lawom na mang gabii didto na lang siya pakatulga sa ilahang guest’s room.

Wala makapahiyos sa mga nanghubag nga mata ang pamahayag sa anak. Gimaymayan gihapon siya sa iyang amahan. Gipasabot nga kinahanglang mananghid-pahibalo gayod kon asa siya moadto. Buwahan, simbako naay mahitabo, nasayod na daan sila sa lugar. Ug dali rang dumdomon.

Makonektar kining hitaboa sa nahitabo sa karaang barangay hall sa Kamagayan. Diin matod pa sa sinugdanan, dunay nakahunghong ni Cebu City Mayor Michael ‘Mike’ Rama nga kini gipapuy-an ug gihimo nang rental house sa barangay kapitan. Tuod man, gipaimbestigahan sa mayor ug sa kataposan, nasayran nga ang gipapuyo diay dinhi, kadtong apektadong vendors sa nakontrobersiyang terminal nga gipahunong sa city hall. Gani, ang kapitan pa kunoy miabaga sa balayranan sa suga ug kuriyente bugti sa gikasabotang limpiyohan lang kanunay sa namuyo ang libre nilang gipuy-an.

Dili unta masabyaga'g hugaw ang kaligdong sa kapitan kon sa pagsugod pa lang niyag himo niini, nananghid ug gipahibalo na niya si Mayor Mike. Sanglit, ang mayor na man mismo maoy mokorehir sa sayop nga info nga gihunghong ni marites kaniya.

Apan nakalimot ang kapitan nga ang pananghid-pahibalo ngadto sa mayor bahin sa unsay iyang gibuhat importante kaayo. Hinungdan, nga napiksan hinuon siya sa mga halang nga huhungihong. Unta, magmatngon na siya.