Pagtiwas sa 44-anyos nga kanta
Dunay ugong ang demo sa tulo ka kanta ni John Lennon nga gi-record sa cassette tape sa iyang bay sa Dakota sa New York. Pero ang ugong sa ikatulo, “Now and Then,” mas kusog. Maong ang unang duha ray na-release: “Free as a Bird” sa 1995 ug “Real Love” sa 1996.
Si George Harrison ang unang nisurender human sa tibuok hapon nilang pagsuway niadtong 1995. Kay demokrasya mang Beatles, way nahimo silang Paul McCartney ug Ringo Starr. Bisan ang producer nga si Jeff Lynn niangkon nga di matangtang ang ugong.
* * *
Way nahitabo sa kanta sa nisunod nga 28 ka tuig. 22 ka tuig na human sa kamatayon ni George tungod sa kanser sa baga niadtong 2001. 43 ka tuig na human gipusil-patay si John niadtong 1980. 81 anyos na si Paul karong adlawa. 83 anyos na si Ringo sunod buwan.
Pero wa mawad-i og paglaum si Paul. Nagpabiling masaligon nga makakita ra sila og paagi nga mapabati sa publiko ang 44-anyos nang kanta ni John (segun sa iyang biyuda nga si Yoko Ono na-record niadtong 1979).
* * *
Kon matinuod ang pahibawo ni Paul sa BBC, mahimong mabatian na karong tuiga ang bag-ong bersiyon sa “Now and Then” nga maglakip sa tampo sa laing tulo ka sakop sa Beatles (kay giklaro ni George sa 1995 nga di siya mohimo og kanta uban nilang Paul ug Ringo kon di maapil ang tingog ni John).
Ang mas kumpletong bersiyon sa kanta mopabati sa sista ni George (na-record sa ilang reunion sa 1995), drums ni Ringo, ug bass, vocals ug dugang lyrics ni Paul (kay wa matiwas ni John ang orihinal nga lyrics parte sa paghigugma nga puno sa pagpangayo og pasaylo).
* * *
Duhay nakatabang sa paghimo sa posibleng kataposan nang record sa Beatles. Una, ang artificial intelligence nga nilampos sa wa mahimo sa 1995: Pagbuwag sa tingog ni John gikan sa piano ug sa ugong.
Ug ikaduha, si Peter Jackson sa “The Lord of the Rings.” Nakatabang ang iyang paghimo sa documentary, “The Beatles: Get Back,” ug iyang code writers. Gisugo nilang computer paglahi sa tingog ni John aron mas gawasnong masagol sa trabaho nilang Paul, George ug Ringo.
* * *
- Latest
