Paghigugmang na-misinterpret

Niadtong nagpurolpurol pa ko, ang among pagtan-aw sa kaparian sagrado kaayo. Mao nga kon makasugat gani mig pari, mangluhod gayod kami ug mo-amen.  Ambot kon gituyo ba sa panahon, nga sagad sa mga pari nga akong nahimamat samtang nagtubo pa ko, mga buotan ug gaan kaayog mga buot. Apan dihang midako na ko ug miapil pagserbisyo sa simbahan, nakita nako nga aduna diay pari nga kusog mangasaba sa iyang mga gingsakopan.

May layko nga miasoy. Daghan na kuno sa iyang kauban ang mihunong pag-serve tungod sa pagkahingasaba sa ilang pari. Ako siyang giingnan: “Brod, ang kasaba gikan sa amahan usa ka dakong gugma. Basin, naa siyay nakitang sayop. Ug gusto lang niyang korihian ang hingtungdan aron dili kini mahitumpawak sa daotan?”

Adunay iyaiyang matang sa pagpangasaba. May pinasingka, dunay pinabugnaw. Pero parehong paghigugma gihapon kini. Hinungdan, dihang nakita niya nga ang imong gilaktan paingon sa bung-aw sa kamatayon, gisinggitan kag kusog aron makalikay sa giatubang nga kakuyaw. Timaan, nga gihigugma-mahal ka sa pari.  Pero kon walay gugma? Pasagdan ka, uy!

Isip mangangalagad sa simbahan, kadaghan na ko kasab-ig pari. Dili kuno maklaro akong sinultian, wala siyay nasabtan sa akong binasahan. Ug kinahanglang magpraktis gyod kunog basa daan sa amoa.

Misiyok akong mga dalunggan sa iyang gipangyamyam. Ako nga tigsulatan og binisayang artikulo ug natigulang na pagbatbat og Siete Palabras, dili gihapon larino mobasag Readings atubangan sa mikropono?  Pero bisan gamay wala gyod ko batiag kasuko. Naglipaghong man tuod ko tungod sa tumang kaulaw, nagpabilin ang taas nakong respeto sa pari.

Iyahang otoridad ang pagpamadlong ug akong obligasiyon ang pagtuman sa unsay iyang gustong ikorehir sa akong binasahan. Busa sa tumang pagpaubos, human ko makapangayog ‘Sorry, Father. Akong paninguhaon sunod.’, gihikap nako iyang abaga dungan ang pag-ingon: “Thank you, Father!” Ngano?

Tungod kay ang magpaubos, ipataas. Ug labaw sa tanan, ang pag-ila ko sa iyang pagpangasaba usa man ka amahanong gugma nga na-misinterpret lang sa mga layko, kinsa inay makigbisog pagtubag sa mga pagsulay nga gihatag sa Ginoo, sila mihunong hinuon sa pagpangalagad sa simbahan.

Unta, kining akong kasinatian makahatag og lamdag sa nalandongang hunahuna sa mga layko. Ug mobalik na sila sa gibiyaan nilang gipanumpaan.