Misteryosong pagpakahilom
Kon sundon sa ubang mga gobernador ug mga mayor ang awhag ni Cebu Governor Gwen Garcia, gawasnon nang binagliyaay og baboy gikan ug ngadto sa mga lugar nga dunay mga kaso sa African Swine Fever (ASF).
Kon sakto ang siyensiya nga gisandigan sa Bureau of Animal Industry (BAI) pagpatuman sa ASF protocols, nga naglakip sa pagpatay sa tanang baboy nga nahimutang sud sa 500 ka metro nga radius gikan sa mga baboy nga natakdan sa ASF, mao ni sinugdanan sa paghagsa sa P200 bilyones nga industriya sa baboy sa Pilipinas.
* * *
Niinsistir si Garcia nga wa matinuod ang pasidaan sa BAI nga mangamatay ang daghang baboy sud lang sa pila ka semana kon di patyon ang tanang baboy duol sa positibong mga kaso. Kini bisan sa mga reklamo nga mas daghang ang nangamatay kay sa giangkon sa Kapitolyo.
May mga taho nga pipila ka negosyante nigamit og backhoe aron paspas nga malubong ang nangamatay nila nga mga baboy sa di pa mahibaw-an sa mga silingan. May mga nisumbong sa ilang mga mayor. Nga nipili pagpakahilom kay tingalig silay sunod masabonan.
* * *
Kadudahan ang report ni Cebu Provincial Veterinarian Dr. Mary Rose Vincoy. Sa way paghisgot pila ang nangamatay nga mga baboy sa Sugbo, nipasalig siya nga way bisan usa sa nangamatay nga natakdan sa ASF. Nihit ang iyang mga numero:
• 64 ang nangasakit hangtod sa Hunyo 7, 2023 (way petsa kanus-a nagsugod ang iyang ihap);
• 23 ang positibo sa ASF;
• 16 ang natakdan sa hog cholera; ug
• 25 ang negatibo sa ASF ug hog cholera (way detalye nganong nangasakit).
* * *
Ang makapahibung nga pasalig ni Vincoy nga way baboy sa Sugbo nga namatay sa ASF kalabwan lang sa misteryoso niyang pagpakahilom, hangtod karon, sa seryosong pasangil sa iyang maestra nga si Cebu City Veterinarian Dr. Alice Utlang:
• Nga gitagoan ni Vincoy gikan sa mga Sugbuanon ang mga kaso sa ASF nga nakumpirmar sa laboratoryo sa BAI niadto pang Nobyembre sa niaging tuig; ug
• Nga ang unang kaso sa ASF nakit-an sa Vito, Minglanilla niadtong Nobyembre 16, 2022, dul-an upat ka buwan sa wa pa angkona ni Vincoy ang ASF sa Carcar City niadtong Maro 6 karong tuiga.
* * *
- Latest
