Bililhon ang kinabuhi

Sunodsunod na ang kaso sa mga pagpatay, nagpakamatay ug namatay tungod sa disgrasiya sa nagkalainlaing dapit halos kada adlaw. May gipusil-patay samtang nagsakay og traysikad sa dalan B. Rodriguez, dunay gibirahan-tumba nga mamuhatay’g lapida ug mamaligyaay’g bulak sa Calamba ug niatong Mayo 16, 2023 patay dihadiha ang drayber sa motorsiklo, kinsa kusog mipabulhot ug mituyo pagbangga sa gikasugat nga multicab sa may dalan Juana Osmeña.

Makapabalaka na kining maong mga dugoong panghitabo. Tataw kaayong nagpakita nga wala na girespeto sa tawo ang kinabuhi sa uban ug sa iyaha mismo. Nakalimot, nga dili kita maoy tag-iya niini. Kon dili, ang Ginoo – ang Magbubuhat sa tawo ug sa yuta, niining temporariyong dapit nga atong gipuy-an. Busa angay ampingan.

Matud pa sa opisyal sa City of Talisay-Traffic Operations and Development Authority, sulod sa unang tulo ka bulan ning tuig 2023, nagkadaghan ang disgrasiya sa mga sakyanan sa Cebu South Coastal Road (CSCR). Sa Enero dunay 210. Pebrero may 205 ug Marso adunay 224.

Kini nagpaila lamang unsa kadaghan ang wala na makaila unsa kasagrado ang kinabuhi ug mipakasama na lang niini nga walay bili. Hinungdan, nga dili mahadlok mopatay ug magpakamatay oras nga hasmagan sa mga suliran sa kinabuhi.

Sama sa drayber sa motorsiklo nga nahisgotan na sa unahan, diin sugid pa sa hinigugmang miangkas, siya nanaog kay walay helmet ug nananghid nga maglakaw na lang. Pero nagwala hinuon ang nobyong hubog, miligid sa dalan, mosugat sa mga nagdagang sakyanan kay gusto na lang magpaligis.

Unya dihang gitambagan niya ang boyfriend nga papaulion na lang, misakayg balik sa motorsiklo, mipabulhot pagpadagan ug sa walay kukahadlok mituyo pagbangga sa multicab nga gikasugat.

Makatandog ang gipamahayag sa drayber sa multicab. Gusto siyang molikay sa disgrasiya aron walay kinabuhing mausik. Milihay-padaplin. Mihunong. Pero naabtan g’yod siya sa nagpakamatay’ng motorcycle driver, kinsa niadtong tungora gipakawala nay bili iyang kinabuhi kay nag-away diay silang managhigugmaay.

Sakit paminawon nga bisan sa tumang pag-amping sa pagmaneho, ang pangunahang bahin sa multicab, dapit sa driver’s seat puwerting gubaa. Maayo na lang, wala maangin ang drayber sa multicab.

Good is good. Panalipdan gayod Niya kadtong nagpaduol Kaniya. Kadtong nakaila unsa ka bililhon ang kinabuhi nga Iyang gihatag kanato.