Panerbisyo sa Postal office

Kaniadto sa wala pay internet, daghang sulat ang ihatod sa mga kartero ngadto sa kabalayan ug mga etablisamento. Apil na niini ang claim notice sa mga package nga gipadala gikan sa halayong lugar.

Ultimong ordinaryong sulat, moabot gyod ngadto sa gipadalhan. Labi nag-registered mails. Kini tungod kay masubay man ug masayran: unsa, asa ug kinsa ang nakalangay sa registered mail nga sagad mga importanteng dokumento o mahalong package ang sulod-gipadala gikan sa mapinanggaong Overseas Filipino Workers nga mga anak ngadto sa ila nang senior citizens nga ginikanan.

Kanhi, mga buotan pa halos tanang taga postal office. Tuod, may nahilabtan mang package nga sekretong gipangablihan sa pipila ka badlongong kaubanan, pero makuha gihapon kini sa gipadad-an. Medyo sakit lang. Kay kulang na man.

Ubay-ubay nang nangabiktima ning salawayong buhat ang nangreklamo sa maong ahensiya. Pero makalibog. Kay bisan ning nagakaabanse na natong panahon, diin may CCTV na nga nagbantay-mopakita sa matag lihok sa mga empleyado ug may internet nang morekord sa tanang importanting transaksiyon sulod ug gawas sa opisina, imbes dali rang masubay ang gigikanan sa suliran, migrabe hinuon.

Akong anak, kinsa taudtaod nang nagtrabaho sa Canada, kang kansang suweldo gamay ra kaayo, igo rang iabang sa kuwartong giestaran ug igasto sa inadlaw niyang kinahanglanon, monas ginhawa intawong paningkamot nga makapadala namong iyang Nanay ug Tatay og mga medisina, bitamina ug ubang food supplements agig pakita sa iyang gugma’g pagmahal.

Niining bag-o, pinaagi sa Viber nagsige siyag pangutana kon naabot-dawat na ba namo ang nahisgotang tambal-bitamina nga motulo ka bulan na kapin niyang gipadala pinaagi sa postal office. Mas mahal man god kon ipaagi niya kinig LBC o ubang private commercial courier. Mao nga nag-postal office na lang para makabarato.

Hangtod sa pagsulat niini, wala pa namo madawat ang iyang gipadala. Nga tingaleg maabtan na la’g expiry date nga dapat tomaron kini, dili gihapon moabot kanamo. Dili kay kami rang misis ang nakatilaw ning susamang makapahiubos nga kasinatian. Tingale, ubay-ubay na. Kaanindot unta, kon atong postal office makat-on na sa pagbag-o sa ilang imahe diha sa pagpangalagad kanatong katawhan. Unta, hingpit na nilang isalikway ang salawayong kalaksot ug hulipan sa dili hitupngang katahom.