Balay ko sa Langit

Ikalimang Domingo sa Pasko sa Pagkabanhaw

Mga Pagbasa: Buh. 6;1-7/Sal. 33/1 Ped. 2;4-9/Jn. 14;1-12

Maayong Balita

Nindot ang gipasalig sa atong Ginoong Jesus ngadto sa iyang mga tinun-an.

“MOADTO AKO SA AMAHAN UG MAG-ANDAM OG DAPIT ALANG KANINYO, MOBALIK AKO ARON KUHANON KO KAMO ARON BISAG ASA AKO, ATUA USAB KAMO!”

Mga pasalig nga angayan natong lauman. Nagpaila usab kini nga bisan anaa man kita ning kalibutana apan dili kini mao ang atong padulngan.

Adunay giandam ang Dios alang kanato nga mas nindot pa kaysa atong naangkon karon. Angayan lamang nga magpiskay ug maningkamot kita alang niini.

Makab-ot lamang nato kini kun sa kang Kristo kita moagi nga mao ang dalan, kamatuoran ug kinabuhi.

Kasinatian

Daghang dalan ang gisubay ang matag usa kanato. Apan ang dalan padulong sa Paraiso nga giandam sa Ginoo malisud kun buot hunahunaon.

Kini tungod kay demanding man ang ebanghelyo. Apan kun kang Kristo kita moangkla. Nga sa ato pa atong subayon:

1. Si Jesus ingon nga bugtong dalan padulong sa langit. Ang krus diin siya gilansang maoy bugtong hangupon.

2.  Ang kamatuoran nga giwali ug gipuy-an ni Jesus.

3. Ang kinabuhi ni Jesus mao man ang sumbanan usab sa atong kinabuhi.

Ang iyang kinabuhi mahimong atong sabton ingon nga kinabuhi sa dakong paghigugma. Ato kining ipakita diha sa paghigugma sa Dios labaw sa tanan ug sa paghigugma sa atong isigkaingon sama sa atong paghigugma sa atong kaugalingon.

Lihok

Hagit natong tanan nga himoong langit kining atong katilingban pinaagi sa paghimo og maayo dinhi. Matud pa sa motto ni San Bruno: “Only God and for Others.

Pangamuyo

Salamat Ginoo sa imong saad nga sa tukmang panahon makaadto kami sa dapit nga imong pagaadtoan. Ang dapit diin ikakuyog ikaw namo sa hingpit.

Buot kaming mamahimong balaan maingon nga ikaw balaan. Salamat ning maong pagtawag malaumon kaming makasulod sa imong balay sa langit.  Amen.