EDITORYAL — Mga gasa nga di angay balibaran

Usa ka maayong balita kun matinuod kining pahibalo ni US Presidente Jose Biden nga pahatagan ang Pilipinas og dugang pito ka

mga military assets nga makatabang og dako sa modernisasyon sa Armed Forces of the Philippines.

Si Biden mipahibalo niini atol sa state visit ni Presidente Ferdinand Marcos Jr. didto sa Amerika nga matapos karong adlawa.

Ang mga ihatag naglakip sa duha ka 34-meter Island Class patrol boats, 27-meter Protector class patrol boats ug tulo ka C-130H transport aircraft.

Kining maong mga gamit mokantidad og bilyon-bilyon ka pesos kun paliton. Dili makaangkon niini ang Pilipinas kun kaugalingon niining pundo maoy agdon.

Sa pagkakaron, ang Pilipinas pinaagi sa Department of National Defense ug AFP padayong nag-moderno. Kining maong mga gamit gikinahanglan kaayo sa Pilipinas dili lang alang sa pagpatrolya ug pagresponde panahon sa kalamidad.

Sayod ang Amerika nga kuwang kaayo ang mga barko sa Pilipinas aron mabantayan ang kadagatan niini, sayod sab sila nga kuwang ang kasamtangang transport aircraft sa Pilipinas nga magamit sa panahon nga dunay kalamidad.

Kaning tanan kun maaprubahan sa Kongreso sa Amerika, madugang sa kasamtangang kagamitan sa AFP nga sa pagkakaron nagpaabot sab sa duha ka Cyclone class patrol boats nga una ng gidonar sa US niadtong buwang sa Abril.

Samtang nindot paminawon ang mga pulong nga “dili nami modawat og secondhand” nga maoy pasiatab sa nakalabay nga administrasyong Duterte, ang mga ingon niini nga gamit nga gikinahanglan kaayo ug gihatag nga libre dili angay balibaran.

Gawas sa maong mga gamit si Biden mipahibalo nga mopadala kini og trade investors aron mangita og mga negosyong mamahimo nilang maka-partner ang mga Pilipinong negosyante.

Gipaabot nga kini makapalambo sa ekonomiya sa nasud ug makahatag og dugang mga trabaho.

Gipahibalo sab sa Amerika nga sa umaabot nga mga katuigan, mo-hire sila og liboang mga Filipino seamen para sa ilang merchant vessels.

Tinuod nga duna kini kondisyones nga posibleng konektado sa Enhance Defense Cooperation Agreement tali sa Pilipinas ug US bahin sa pagtugot kanila makagamit sa mga piniling base militar sa AFP.

Apan karon nga ang Pilipinas gidasok sa suok sa gamhanang China, wala kini laing dal inga masangpit kondili ang Amerika.

Ang Pilipinas maoy kinadugayang defense treaty partner sa Amerika bisan tuod og wala kini kaayoy natampo kanila.