EDITORYAL - Power outage napud sa tugpahanan

Subling nahasol ang mga pasahero nunot sa pagkadelatar ug dayon pagkanselar sa ilang mga flights diha sa Ninoy Aquino International Airport tungod sa lain napud insidente sa power outage.

Kani nga senaryo nahitabo na niadtong Enero 1 ning tuiga nga diin tanan gyung flights nakanselar ug ang kawanangan sa Pilipinas walay naglupad-lupad nga abyon.

Kagahapon, atol sa pagtimaan sa Labor Day subling nakasinati og susamang problema ang NAIA Terminal 3 sayo palang sa buntag.  Apektado ang mga pasahero tungod kay ang mga airlines nga diin sila naka-book nikanselar sa ilang mga biyahe.

Ang pagkadelatar sa mga flights kagahapon nakaapektar sab sa kamada sa flights sa nagkalain-laing mga rehiyon nga padung didto sa NAIA sama dinhi sa Mactan Cebu International Airport. Daghang pasahero ang nagbagulbol kay dili matubag sa mga airport frontline personnel ang tanan nilang pangutana.

Hinuon nabalik na kini pagkahapon kagahapon, apan dili na mabawi pa ang mga oras nga nawala para sa mga pasaherong nadelatar ang biyahe. Nahasol ang uban tungod kay ang uban kanila dunay giapas nga mga oras ngadto sa ilang padulngan.

Ambot og duna bay nakat-onang leksyon ang Civil Aviation Authority of the Philippines ug ang Department of Transportation sa nahitabo niadtong Enero. Nganong wa man sila managana daan sa posibilidad nga masubli kadto.

Pila ka milyon ka pesos nga ekonomikanhong kalihokan ang nawala sa Pilipinas tungod lang aning pagkadelatar ug pagkanselar sa mga flights, apan hangtud karon wala gihapoy panglantaw sa ugma ang mga hingtungdang ahensiya.

Aduna nay inisyal nga resulta sa imbestigasyon sa nahitabo kagahapon  nakita matud pa nga diha mismo sa sud sa NAIA Terminal 3 ang problema ug dili sa nag-suplay ilang kuryente. Kani unta maoy panaganahan daan sa mga otoridad ug mga nagdumala sa tugpahanan, nga kinahanglang preparado sila sa tanang oras aron dili mahasol og maayo ang mga pasahero.