Ang Emmaus Abril 23, 2023

Ikatulong Domingo sa Pasko sa Pagkabanhaw

Mga Pagbasa: Buh. 2;14,12-33/Sal. 16/1 Ped. 1;17-21/Lk. 24;13-35

Maayong Balita

Duha ka mga tinun-an nipanaw padulong sa Emmaus. Samtang nagpanaw sila ilang gihisgot hisgotan ang nahitabo dili pa lang dugay ug kini ang kalabot sa pagkamatay sa ilang magtutudlo. Nikuyog sa ilang panaw si Jesus Ang duroha wala makabantay niini kini tungod kay sila nahimong napuno sa kaguol ug kasagmuyo. Tingali alang kanila ang Ginoo usa ka dakong pakyas. Apan nahigmata sila ug nakaila sa nabanhaw nga Ginoo sa iyang pagpikas pikas sa pan.

Kasinatian

Dunay mga higayon sa atong kinabuhi nga down kaayo kita gumikan sa mga suliran. Lisud ang kinabuhi labina kun wala nato matino kun asa kita padulong human mapakyas ang atong mga gilauman. Kining maong kapakyasan usahay makapawala kanato sa direksiyon. Apan kun mabalik sa kasinatian nga naghatag kanato og kalig-on ang defining moment sa atong kinabuhi, nga maoy hinungdan kun nganong ania pa kita hangtud karon padayong naningkamot ug nanlimbasog. Ang pagpikas pikas sa pan nga gihimo sa Ginoo NAKAAMGO kanila nga ang Sagrada Eyukaristiya ingon nga sakripisyo mao man ang pinakataas nga halad nga gihimo sa ilang magtutudlo alang sa iyang mga higala ug alang sa tibuok kalibutan. Mao kini ang rason nganong kinahanglan silang mopadayon.

Lihok

1. Sa Panahon sa atong dakong kalisdanan ug kasubo giunsa man nato kini pagsabot? Sud-onga ang Krus kay bisan pa man kun magun-ob ang tibuok kalibutan, magpabiling lig-on ang krus……

2.   Pahalinga ang kainit sa Diosnong gugma aron padayon kitang mabuhi ug dasig sa pagsunod sa mga tunob ni Kristo taliwala sa mga kalisud.

Pangamuyo

Ginoong Dios namo sa makadaghan kami nangaluya ug nasubo. Nakalimot kami nga anaa ka ang sukaranan sa tanan namong paningkamot. Padilaaba ang among kasingkasing sa imong pulong sa kahupayan ug himoa kaming madasigon diha sa among pagsunod ingon mga katawhan sa kabanhawan ug unta ang aleluya maoy among himno sa pagdaug. Amen.