Mga mansa sa gitinguhang kalimpiyo

Nagkadaiyang baho sa hugaw sa tawo nga mahanggap uban sa huyohoy samtang magpahayahay sa may ‘baywalk’ sa Cebu City South Road Properties; Ang naglaundok nga basura daplin sa kadalanan nga usahay mahimo nang bungdo sa mga nangalisbong hugaw nga gipistahan sa mga langaw; 

Ang mga badlungong anino, kinsa bisag kadaghan na gipanghipos pero mobalik gihapon sa naandan nilang buhat – ang pagpuyo sa mga aseras nga daw ilahang balay-katulganan;

Pipila lamang kini sa makaugtas nga buling, nga nahisama sa kinaproblemahang mansa, diin bisag humolan pag Clorox, mapaso ka na lang sa pagkinusokuso, ang maong mansa dili gyod matangtang.

Dakong babag kini sa gipahingusgang programa ni Mayor Michael ‘Mike’ Rama nga taudtaod na niyang nasugdan – ang paghimo sa atong dakbayan nga usa ka Singapore-like Cebu City.

Busa niining bag-o, gihatagan niyag ultimatum ang tanang opisyales sa kabarangayan pagseryosog tuman sa ilang obligasiyon human makita sa alkalde nga sulod sa kadugay na nilang pagpangalagad, ang nahisgotang suliran hangtod karon nagpabiling suliran.

Matod ni Mayor Mike: “June 12. Di na ko gusto makakita og garbage, 24/7.” Usab, dili na siya buot makakitag libud-suroy nga mangatulog sa sidewalk/aseras. Busa midugang-pahimangno: “June 12, di na ko kita mga tawo matulog.”

Nindot pustahan og linabtikay: Matuman kaha kini, o dili? Dili kaha sama sa naandan, himoon unyang rason sa mga barangay official nga ilang garbage truck guba, mao nga dili makuha ang basura? Ingkasog dili makatuman ang mga barangay official, andam ba paghatag og sanction si Mayor Mike kanila?

Ang dili makatuman sa maong kasugoan, makonsiderar nga mga mansa or dagkong sagabal sa gitinguhang hingpit kalimpyo sa atong siyudad. Unta, maoy mohari ang political will ug dili ang pagpamolitika, nga maoy hinungdang pasagdan na lang ang mga konstituwente pagbuhat sa gidili kay hadlok ang opisyal nga dili botaran inig ka eleksiyon.

Dako kining hagit sa mayor ug sa iyang barangay officials. Diin inig abot sa Hunyo 12, 2023 atong masayran, kinsa kanila ang nagpabiling mansa ug kinsa ang mansa-remover?

Kay hangtod dili matangtang kining tanang mansang namilit sa atong dakbayan, dili gyod nato makab-ot ang ginadamgong Singapore-like Cebu City ni Mayor Mike.

Unta, ma-stain remover silang tanan!