Res Ipsa Loquitor

Kinsa ang nagsulti sa tinuod, ang polis o si DILG Secretary Benjamin “Behur” Abalos Jr.? Mao kini ang pangutana nga kinahanglan matagbaw sa tubag ang katawhan.

Niadtong Oktubre 8, 2022 nasakmit sa opisina ni Police Master Sergeant Rodolfo Mayo Jr. sa Tondo, Manila ang 990 ka kilo nga shabu nga nagkantidad og P6.7 bilyones.

Mao ni ang  buot ipatuo sa mga sakop sa Philippine National Policde Drug Enforcement Group (PDEG) nga gipangulohan ni Brig. General Narciso Domingo ug kanhi PNP Deputy Chief for Operation Lt. General Benjamin Santos Jr. ngadto sa publiko.

Apan lahi ang nahibawan ni Department of Interior and Local Government Secretary Benjamin “Benhur” Abalos Jr. sa nahitabong anti-drug operation.

Sa miaging semana gimandoan ni Abalos sila si General Domingo, General Santos ug lain pang walo ka mga opisyal sa kapolisan sa pagbiya lamang una sa ilang katungdanan sa kasamtangan kay kun dili iya kini nga suspensohon. Kini human si Abalos nagduda nga gikawatan og 42 ka kilo ang nasakmit nga shabu ug gibuhian ang nadakpan nga si Rodolfo Mayo Jr. nga usa diay ka polis ug sakop sa Police Drug Enforcement Group.

Ang duda ni Abalos iya kining gibasi sa video footage nga nakuha atol sa gihimo nga ronda diin nakita si Mayo nga giposasan apan gitangtangan ra kini sa iyang posas ug gitugotan nga makabiya sa iyang sakyanan.

Si General Domingo misunod sa mando ni Abalos apan iyang giingon nga ang ilang gihimo may pagtugot ni PNP Chief General Azurin.

Si General Azurin miangkon nga iyang gitugotan ang pagbuhi ni Mayo aron makagiya kini sa mga kauban niini sa PDEG sa pagdakop ug pagsakmit pa sa dugang gidili nga drugas.

Si General Domingo miingon nga napakyas sila sa ilang planong operasyon human siya tangtanga sa paghupot sa operasyon. Kini human migawas ang video footage nga nagpakita nga gikawatan ang shabu nga ilang nasakmit sa iya ra pud nga mga sakop. Iyang giingon nga siya pa ang mimando og imbestigasyon niini.

Unsa man ang ilang mga rason. Ang video footage nag-ingon: RES IPSA LOQUITOR. The thing speaks for itself. Ang video footage nagsulti unsa ang ilang gihimo.