EDITORYAL - Ayaw lang idungo ang camera

Nindot kaayong suroyan ang baywalk diha sa entrada sa Cebu South Coastal Road padung sa South Road Properties sa Cebu City, ilabi na panahon sa gabii tungod kay makita ang mga dagitab sa mga panagatan diha sa atbang sa habig sa lungsod sa Cordova.

Nisamot pa gyud kini kanindot suroyan ug kuhaan og hulagway panahon sa kagabhion tungod sa nindot kaayong talan-awong mga suga sa Cebu Cordova Express Link (CCLEX) nga matag semana lain-lain og kolor ang suga.

Maayo lang magpakuha og hulagway sa lugar, apan dili maayong hanggabon ang hangin kay pwerteng bahoa sa mga basura, nag-una niini ang hugaw sa mga tawo nga pirmeng mangalibang sa lugar.

Kung magpakuha gani og hulagway, dili pwedeng idungo ang camera kay maapil og kuha ang mga basura, usahay, maapil pa ang tawong nagduko-duko kay nagtubag sa tawag sa kinaiyahan.

Gawas pa sa mga manuroy sa lugar, duna say daghang mga fishing hobbyists nga mag-anhaan sa lugar bisan pa man o usahay ang makuha sa ilang pasol mga diapers, napkins o basura.

Nindot unta nga dunay baywalk ilabi na nga dunay mga molabay nga mga barko ug dunay CCLEX nga nakadugang sa kaanindot sa mga makuhang hulagway, apan kining basura ug nangalisbong hangin maoy nakabati sa lugar.

Adlawan man o gabii, nindot suroyan ang maong dapit bisan tuod og bati kaayo ang lugar kay walay tarong nga mga lingkuranan, walay tarong nga adornong suga, ug grabeng nagtipun-og nga mga basura ug nanimahong hugaw sa tawo.

Maayo unta og dunay ahensiya sa gobiyerno o buhatan sa gobiyerno nga moatiman sa lugar. Mahimong ang Cebu City o ba kaha ang Cebu Ports Authority.

Kun kinsa nila ang tinud-anay nga nagtan-aw sa ikaayo sa lugar, maayo unta og molihok nalang ug di na paabuton pang madugta ang dapit ug di na nuon mapuslan ug mahimo unyang sumsoman sa pagpakauwaw sa siyudad sa Sugbu.