Tulo ka ga hinungdan kun nganong makasulod ang yawa sa atong kinabuhi

Tinuod anaa ang sala nga gihimo sa matag tawo mao nga makahimo og impluwensiya sa kinabuhi sa tawo. Gawas sa occult ania pa ang laing tulo ka mga rason kun nganong nahimong makapanghilabot ang demonyo.

1. Kahadlok. Kasagaran ang nasinating kahadlok mahimong pagasugnoran aron kining maong kahadlok molipang pa gyud. Kining maong paglipang sa kahadlok nga nahimong kalisang maoy makapadasig sa gahum sa kangitngit sa pag terrorize sa biktima. Hinumdomi ang kahadlok ug kalisang usahay maoy hinungdan kun nganong kita mosibog na lamang sa hingpit gikan sa espirituhanong tawaway ug pakigbisog. Ang uban nahimong submissive sa mga abusing diabolical gumikan sa kahadlok nga nibilanggo sa hingtungdan. Dili lang kini mahitungod sa espirituhanong pakigbisog bisan gani diha sa balay diin ang mga yawan-ong kinaiya padayong modagmal sa mga hadlokan ug walay ikasukol nga mga linalang.

2. Pagduda. Dakong kalipay sa yawa nga magduda ang usa ka tawo ngadto sa Dios. Ang kawalay pagsalig maoy makapadasig sa gahum sa kangitngit nga mohatag og sayop nga paglaum. Ang maong sayop nga paglaum nga maoy nakapahimo sa hingtungdan nga modangop sa usa ka tawong nangangkon nga sila makaayo sa ilang gihambing balatian. Kining maong balatian nga maayo sa daklit apan mahimong mobalik ug mas mograbe pa hinuon.

3. Garbo. Ang naghinobrang garbo maoy nakapahimo sa mga anghel nga mga demonyo. Sama ni Lucifer nga wala makontento sa gahum nga nahuptan ang buot mohulip sa Dios nga nagbuhat kaniya. Kining maong garbo maoy hinungdan kun nganong gipalayas siya gikan sa langit ug sila kadtong nahimong mga demonyo. Ang atong kinabuhi kinahanglang magiyahan diha sa pagpaubos. Pinaagi lamang niini makasulod ang Dios sa atong kinabuhi.

Atong hinumdoman nga ang yawa dili lang simbolo. Tinuod siya ug aktibo kaayo ug padayong nanghilabot sa atong kinabuhi.