Kausaban

Nausab na gyud ang batasan sa kadaghanang katawhan karong panahona kay wa na kaayo nila gibalaan ang Semana Santa nga maoy paghandom sa pagpasakit sa atong Ginoo didto sa Krus.

Karon, daghang katawhan nga gihimo ang Semana Santa nga paglulinghayaw ngadto sa mga beach aron adto sila magligo-ligo atol sa Huwebes ug Biyernes Santo.

Duna ko’y mga kaila nga sa ila kuno, manganta sila karong adlawa. Kon mao, dako na kaayo og kausaban sa among panahon kaniadto.

Dihang bata pa ko, inig-abot sa Lunes Santo, ingnon na mi sa among inahan nga dili magkiat kay Semana Santa na. Grabe kaayo ang pagbalaan sa mga adlaw sa Semana Santa kaniadto.

Didto sa among probinsya, inig-abot sa adlaw nga Miyerkules, magsubo ang katawhan, ilabi na ang among pamilya kay anaa man sa among hunahuna nga gidakop na ang Ginoo.

Mokaon man tuod mi apan dili gyud magbusog, ug sa Biyernes Santo did-an mi sa among mama nga magsugba ug bisan unsa nga igsusugba.

Maingon nato nga subra na usab kaayo ang mga karaan kaniadto, apan sa maong gipakita nila nga batasan, magtudlo kini sa katawhan nga mamalandong gyud atol sa Semana Santa.

Dili pareho karon nga kiat lang ang uban, ug resulta adunay mangadisgrasya sa pagpangaligo sa dagat kay naghinubra na ang kakiat.

Husto kaayo ang pasidaan ni Arsobispo Jose Palma nga ang Semana Santa gitumong aron sa pagpamalandong nato sa atong mga dili maayong binuhatan.

Dili gyud tukma nga abi kay taas man kaayo ang bakasyon ug way trabaho, molarga ngadto sa Bantayan, sa Boracay ug uban pa nga mga dapit suroyanan aron maglulinghayaw.

* * *

Gitun-an karon sa Department of Education (DepEd) nga ibalik ang naandan nga mga buwan sa klase. Kon himoon kini nila nindot kaayo.

Naanad man gud ta nga ang klase magsugod sa Hunyo ug motapos sa buwan sa Marso. Duna lay panagsa nga ang klase moabot og Abril kon adunay mga adlaw nga tingklase nga wa makapahigayon og klase, ug ilisan kini sa laing mga adlaw.

* * *

Mireklamo ang mga tagdumala og pribadong tunghaan nga did-an na sila sa ilang policy nga kadtong mga tinun-an nga dili dayon makabayad sa tuition fees, dili paapilon sa examination.

Mosangpot kuno kini sa pagpanirado na lang sa ubang tunghaan kay di na man sila makapanweldo sa ilang mga magtutudlo.

Bitaw sab. Luoy baya pud ang mga tagdumala og tunghaan. Pero mas maayo tingali nga bisan og dili makabayad, paapilon lang, apan dili ihatag ang grado kon dili gyud mobayad.