Natapos na

Pagkaon nila ni Eba ug Adan sa gidiling bunga sa paraiso, natapos ang ilang pagpuyo sa kinabuhing walay kataposan ug gibalhin sila sa kalibotan, diin kinahanglan na silang molihok aron makakaon-mabuhi pinaagi sa pagtikad sa yuta, diin gikan ang tawo.

Sa Daang Testamento, diin makighinabi pa ang Ginoo nila ni Moses, Noah, Abraham, ug sa ubang propeta, kinsa Iyang gisangonan paggiya sa katawhang nahisalaag aron makatultol sa hustong dalan ug makaila na sa tinuod nga Ginoo, ubay-ubay tuod ang nakat-on. Pero mas daghan ang wala motuo.

Sa Bag-ong Testamento, ang bugtong na gyod Niyang anak maoy Iyang gipadala dinhi sa kalibotan. Dose anyos pa lang, nagsugod nag panudlo si Hesus sulod sa mga sinagoga. Iyang gibuhat tanang sugo sa Iyang Amahan aron lamang maluwas ang tanang makasasala.

Naghimo Siyag mga milagro. Nagtukod og kaugalingong ministry. Ang 5 ka pan ug 2 lamang ka isda, iyang gipadaghan. Nga nakapakaog 5000 ka gipanggutom, unya may nasobra pang 12 ka bukag. Nangalim Siyag mga masakiton ug mipagulag yawa sa mga giyawaan. Pero nangasuko hinuon Niya ang mga Hudeyo: gikan sa ultimo ngadto sa kadagkoan. Hangtod gilutos-dakop, gikastigo, gipapas-an ug gibitay sa balabag. Ingon niini katig-ag kasingkasing ang mga tawo kaniadto. Ug misamot niining atong panahon. Tan-awa unsay headline sagad sa kamantalaanan: Illegal drugs mibaha, Natulog sulod sa balay gipatay, Riding-in-tandem strikes again, Kabitkabit nauso, Divorce law gipanday sa Senado ug daghan pang daotang buhat nga mialkontra sa kabubut-on sa Ginoo.

Pastilan, sa kadugay na natong balikbalik pagyukbo-pamalandong niining Semana Santa, labi na sa Biyernes Santo, diin sa ikaunom Niyang paglitok sa kataposang 7 ka pulong: “Consummatum est. Natapos na” Iyang misyon pinaagi sa pag-ula sa Iyang dugo aron lamang kitang makasasala maluwas, nagpabilin gihapong buta ug bungol ang kinabag-an kanato.

Mga igsuon ko, ayaw paabota nga inig kamatay na nato kita maghinulsul sa atong kasaypanan. Kay segurado!  Inig atubang nato sa atong Maghuhukom, pahinumdoman ta Niya: “Sa buhi ka pa, hasta kapila tika tanyagig ‘kaluwasan’.

Bisan, sa nahabiling yugto sa Akong pagpanubos itaas sa krus, gihagad tikag kaluwasan. Pero, imo Kong gilud-an-giyam-iran. Kalag, natapos na ang mao nimong kahigayonan. Ug wala kay luna dinhi sa Langit.”

Hala, no?