Asawa gitulis sa bana

Gitulis sa iyang kaugalingong bana ang iyang asawa nga tindera sa usa ka burger junction human wala mahatag kaniya ang iyang gipangayo nga salapi para palit og ilimnon nga makahubog.

Gitionan ni Alexander Grapa og screw driver ang iyang asawa nga si Angelie Grapa dihang gihatagan lang siya og P300. Reklamo sa bana nga nagsabot na siya ug sa iyang asawa nga hatagan siya og P500 para palit niya og ilimnong makahubog.

Ang asawa mipasabot sa iyang bana nga dili niya mahatag ang lima ka gatos tungod kay magpadala pa siya og salapi sa ilang mga anak didto sa Negros. Tungod sa kasuko, gibunot sa bana ang dala niining screw driver og iyang gitulis ang iyang asawa. Nadala gayod sa bana ang P1,200 nga halin sa burger junction.

Gisumbong dayon sa asawa ang iyang bana ngadto sa polis ug sa tag-iya sa manager sa burger junction. Dali rang nadakpan sa mga polis si Alexander Grapa.

Pagka walay hinungdan nga pagka bana. Siya pa ang walay trabaho siya pa ang masuko kon dili hatagan og salapi. Maayo unta kon ang gipangayo nga salapi para palit og bugas o tambal. Para palit pa gyod og ilimnong makahubog.

Maayo kay gitinuod gayod sa asawa ang iyang bana nga iresponsable.

Samtang may bana nga nanulis sa iyang asawa kay wala makontento sa salapi nga gihatag sa iyang asawa para palit og ilimnong makahubog, aduna pod nanunggab sa iyang silingan tungod kay wala hatagi og bukog sa isda para pakaon sa iyang iro.

Gidunggab ni Elmer Canurbay si Junard Villarta human wala hatagi og bukog sa isda para pakaon sa iyang binuhing iring. Gibalibaran sa biktima ang suspetsado tungod kay wala pa sila makakaon.

Pagkahanggaw ba pod ning suspetsado. Unsaon ba pod paghatag sa biktima og bukog sa isda nga wala pa man diay bukog kay wala pa sila makakaon.