EDITORYAL - Wala masayop si Robredo

Nabatyagan na karon sa mga Filipino seafarers sa Uropa ang epekto sa wala paghatag og pagtagad sa nakalabay nga administrasyon sa mga pasidaan bahin sa mga kakulangon sa mga Pilipinong overseas seafarers.

Atol sa nakalabay nga administrasyon, usa sa gitinguha ni kanhi bise presidente Leni Robredo mao ang pagpalambo unta sa mga maritime trainings ug accreditations para dili lisud-lisuron ang mga Filipino seaman nga gustong mosakay og barko sa abroad.

Apan gibiay-biayan lang si Robredo kay di siya eksperto niini. Gipakagamay lang sa mga seafarers nga nanakay na og barko ang iyang pasidaan bahin niini.

Apan ning bag-o, daghan na kanila ang naglisod og sakay sa mga European-flagged vessels tungod sa kataas na sa gipangayong mga standards.

Bisan kadtong mga nakakuha og dugang trainings ug upgrading, wala gihapon makasakay kay dili accredited ug wala kaabot sa international standards maong wala ilha didto sa Uropa ang ilang mga sertipiko nga gikan sa Pilipinas. Sa pag-inspeksyon sa European Maritime Safety Agency (EMSA) nahigmata ang gobiyerno sa kakulangon niini ug giisip nila kining pagpukaw sa maritime education system dinhi sa Pilipinas.

Sa audit sa EMSA — kuwang og training sa mga ekipo , dili pare-parehas og training ug assessment ubos sa Standards of Training, Certification and Watchkeeping for Seafarers (STCW) convention ang mga Filipino seafarers.

Kaning problemaha nakita na niadto pang 2006, maayo nalang nga wala pay laing mga nasud nga nakaparang sa gidaghanon sa mga kadeteng Pilipino kada tuig.

Naabtan pa og tuig 2022 dihang ang European Union mihatag og ultimatum sa 50 mil ka Pinoy seaman nga nagsakay sa ilang mga barko nga sila mawagtangan og trabaho, apil na niini kadtong mibiay-biay kang Robredo, kun di sila makapasar sa standards niini.

Kaning 50 mil ka Pinoy seamen sa European vessels asa man puniton? Dako kini og epekto sa ilang mga pamilya. Asa man ni sila manakay, sa domestic shipping nga barato kaayo og sweldo?

Maayo nalang nga mismo na ang maong European Commission ang mi-offer sa Pilipinas nga tabangan nilang mapalambo ug makapasar sa standards ang mga Pinoy seamen pinaagi sa supota sa gobiyerno.

Way laing mahimo ang gobiyerno kondili ang pagdawat sa maong tabang aron palambuon na ang maritime education, training, and certification (METC) system sa mga seafarers dinhi sa nasud.