Mahiuban ka nako sa paraiso

Padayon ang pagpangligid sa mga adlaw sa Kuwaresma. Mga adlaw nga tingpuasa, tinghugas-paghinulsol sa tanang sala pinaagi sa Sakramento sa Pangompisal uban ang pagpaningkamot nga dili na magkahugaw pag-usab atong tanlag.

Apan pipila ra ba ang nakadungog sa kataposang pito ka pulong sa atong Manunubos nga puno sa gugma, kaluoy ug pasaylo, diin sa dinupa Niyang linansangang mga kamot, Iya tang gitanyagag kaluwasan? Subo palandungon, nga base sa SWS survey, 38% na lang sa mga Katolikong Pinoy ang manimba.

Usa ka diyosnon ug retiradong General Johnny Macanas, YouTube vlogger ug mahilig mopaambit sa mga pulong sa Diyos, nakakabig sa akong atensiyon dihang sa iyang The General’s Opinion vlog, siya mitug-an nga suheto siya sa mga pamaagi sa kasundalohan ug kapolisan. Kay miagi man sab siya pagka lieutenant, kapitan hangtod na-heneral.

Matud niya, tungod sa pangandoy nga makaangkog daghang salapi ug bahandi, natental sab siya sa pag-apil sa mga ilegal nga kalihokan ug negosyo.

Tuod, naangkon niya ang kaabunda sa kuwarta. Apan nahibulong nganong ang kalipay'ng natagamtaman, kulang ug hamubo ra kaayo. Hinungdan, dihang naengkuwentro niya ang Ginoo ug nagpagiya asa makit-an ang matuod nga kalipayng iyang gipangita, gibiyaan niya tanang binuang. Gisurender tibuok kaugalingon ngadto Kaniya dungan ang pag-ingon: “Ginoo, himoa akong Imong suloguon.”

Tuod man, kita sa iyang pag-vlog, gibuhos niya ngadto sa mga pobreng pamilya sa Talaandig, Lantapan, Bukidnon, kinsa halos walay kan-on matag adlaw. Usab, walay tarong kapuy-an. Busa, pagadad-an silag pagkaon sa heneral inabagan sa iyang misis, gibuhatag mga balay ug gitudloan sa pagpananom.

Hago ug magastos kining ilang apostolikanhong ginahimo. Pero dili kakapoy ang gibati sa magtiayong Macanas. Kon dili, tinuod nga kalipay.

Dinhi gipakita sa Ginoo, nga kon ikaw nakasala, unya mobalik Kaniya ug dili na gayod mobulag, bisag tiunayng langit pay imong pangayoon, kini Iyang ihatag.

Ug maoy nahitabo ni Gen. Macanas. Dihang nangayo siya sa Ginoo og tinuorayng langitnong kalipay, kini gihatag.

Ug maoy mensaheng gipasabot sa ikaduha sa kataposang pito ka pulong nga gilitiok ni Hesukristo itaas sa krus, diin kon kita mobalik lamang Kaniya ug dili na magpakapasala pag-usab, kita Iyang gantihan og: “Karon, karon dayon, mahiuban ka Kanako sa paraiso.'