Garbage truck hugasan kanunay

Daghan ang misuporta sa akong sugyot nga ang mga trak sa basura kinahanglan gyud unta nga limpyohan kada adlaw.

Gitataw sa hepe sa Department of Public Services (DPS) chief nga si John Paul Gelasque nga mao kini ang iyang gihimo apan naguba lang kini ang ilang pressure washer.

Pastilan, kabarato nianang pressure washer, dili mo makapalit og ikapuli kon maguba? Law-ayan man gud ko nga magtan-aw nga pwerteng hugawa sa atong mga garbage truck.

Dili malalis nga mahugaw gyud ang mga trak sa basura, kay hugaw gud ang ikarga niini, apan kinahanglan nga kada adlaw hugasan gyud ang garbage truck.

Gani didto sa ubang nasud, inig human gyud og huwad sa mga basura, diha-diha dayon ang mga garbage truck, hinloan dayon aron nga dili kini baho nga magdagan aron mobalik paghakot og mga basura.

Dia ko’y sugyot sa atong mga konsehal sa Cebu City, kay dia man gyud sa atong siyudad mahimutang ang labayanan og mga basura diha sa Barangay Binaliw.

Dili ra kay ang mga garbage truck sa Cebu City ang molabay og mga basura diha sa Binaliw, kondili, apil ang mga garbage truck sa Mandaue, ug ubang mga dapit.

Sa akong paghinuktok, mora’g mas nindot nga magmugna kita og ordinansa nga mag-require sa tagdumala sa pribadong landfill diha sa Binaliw, ug sa uban pa nga mga landfill dinhi, nga magbutang sila og washing area aron adto hugasan ang mga garbage truck sa dili pa mogawas sa ilang compound.

Kinahanglan nga anha gyud sulod sa ilang compound maghugas kay aron ang mga duga sa basura mapunta ra sa ilang pundohanan ug dili makadaot sa tinubdan sa tubig. Dili ba maayo?

Kon matuman ni, dili na kaayo ta mauwaw sa atong mga garbage truck nga gipasumban na lang nga abi kay hugaw ang ikarga nga basura, hasta ang trak nga hakotanan, utro pa nga hugaw.

Unta, makapangita sab og paagi niini ang hepe sa DPS aron nga makaingon ta nga naglihok siya ug wa magduka sa iyang katungdanan.

* * *

Akong ipahibawo nga ang Annual General Assembly sa Cebu Market Vendors Multi-Purpose Cooperative (CEMVEDCO) ugma gyud diay’ng adlawa, Domingo.

Matud ni CEMVEDCO chairman Erwin Gok-ong nga nasipyat ra siya pagsuwat dihang nagpadala siya nako og pahibawo kay imbes Marso 19, nabutang niya nga Abril 19. Mao nga akong klarohon, ugmang adlawa, Domingo, ang general assembly sa CEMVEDCO ug anha kini pagahimoa sa Golden Peak Hotel sa Gorordo Ave.

Magpili usab ang mga sakop og unom ka bag-ong sakop sa ilang Board of Directors.