Katekesis no. 110

Ang giingon nilang milagroso

Duhay nangutana kanako kun unsa ba gyud ning milagro. Nagkadaiya ang matang sa milagro matud ko. Dunay milagro nga gitawag nilang healing miracles labina kun maghisgot kita og pag-ayo sa mga lawasnong balatian. Ang healing miracles mamahimong moayo dili lang sa physical kondili sa bisan unsang espirituhan usab. Gawas sa gitawag nilang nature miracles diin sama sa gihimo sa atong Ginoo iyang gi-defy ang balaod sa kinaiyahan. Sama sa gihimo ni Kristo Jesus diin iyang gipahunong ang subasko sa dihang nibati og tumang kahadlok. gipadaghan pud niya ang pan ingon man ang mga isda. Ang tubig iyang gihimong bino. Kini ug uban pang mga milagro ang gihimo sa atong Ginoo.

Apan unsay kalainan sa milagro ug mahika? Ang milagro pagahimoon gyud sa miracle worker tungod kay dunay dakong panginahanglan. Ang mahika gamiton aron ang nagbuhat sa ingon, masikat. Ang milagro himoon ug kuyog niini dunay personal nga kausaban nga masinati ang tawo. Samtang ang mahika gihimo aron makakwarta ang performer niini. Ang tinuod nga milagro iya sa Ginoo samtang ang mahika mahimong iya sa demonyo.

Ning panahon karon daghanan kanato bisan ang nituo nga kita mga Katoliko ang dali ra gyud kaayo motuo nga kuno ang usa ka tawo gimilagrohan ug ang tawo nga gitwag nilang mga miracle workers. Apan sa kaulahian, bugtong ang ilang mga bulsa lamang ang ilang gipaburot. Pun-an pa sa mga tawong modupa kanila aron sa ingon mahatagan og kaugalingong katumanan ang ilang mga personal nga tinguha. Ang ilang pagkinabuhi ning mga miracle workers kunohay sa atong kapanahonan ang pagaisipon nga saksi sa tinud-anay nilang bulok. Sa dili pa kita motuo, unta pamalandongan nato kini sa makadaghan. Kay daghan sa mga tawo karong mga panahona mangangkon nga sa Dios sila gikunsaran aron makapahimulos sa kadaghanan.