Palili sa duguong away sa Negros Oriental
Kon paminawon ang mga istorya nilang Mayor Janice Degamo sa Pamplona, Negros Oriental, biyuda sa gipatayng si Gobernador c, ug Kongresista Arnolfo Teves Jr., nga bisan wa pa nganli sa kapolisan niangkon na nga siyay pasanginlan sa bangis nga krimen, makapa-alarma ang sunudsunod nga mga kaso sa patay sa probinsiya.
Matud ni Mayor Degamo ang ilang kaatbang sa politika ganahan nga mopasiugda og terorismo. Samtang si Teves niingon nga daghan nang nangamatay sa Negros Oriental, apil nang usa nga naglambigit sa sakyanan sa Kapitolyo, nga gipasagdan lang sa kapolisan.
* * *
Atubangan sa sugo ni Presidente Ferdinand Marcos Jr. sa pagbungkag sa private armies ug pagsakmit sa ilegal nga mga armas, nga iyang gipaneguro nga makahunong sa pinatyanay, nikumpisal si Teves nga hangtod karon naghupot siya og ilegal nga mga armas human gikanselar sa Philippine National Police (PNP) ang iyang mga linsensiya.
Gilista sa PNP ang mga armas ni Teves nga gikanselar ang lisensiya: Tulo ka tag-as ug siyam ka mugbo nga mga armas. Wa mosulti si Teves pila ang iyang nasurender ug pila pa ang padayon niyang gihuptan.
* * *
Samtang nipahasubo sa pamilya ni Degamo, si Teves nipasumbingay nga ang security escorts ni Degamo nakigkonsabo sa armadong mga tawo nga nipatay niya base lang sa CCTV footage nga nipakita sa mosunod:
• Ang mga tawo nga nagbitbit og tag-as nga mga armas sayon nga nisud sa gate nga way bisan usa sa mga guwardiya ni Degamo nga nipugong nila; ug
• Ang mga iro wa mopaghot ug nikitiw hinuong ikog, nga iyang gihubad nga nagpasabot nga nakaila sila sa armadong mga tawo.
* * *
Gihulagway ni Teves nga salikwaot tan-awon nga labihang paspasa sa imbestigasyon sa kapolisan sa pagpatay ni Degamo pero wa masulbad hangtod karon ang mas unang mga patay sa probinsiya. Nipahinumdom si Teves nga ang iyang pagka dili alyado sa Malakanyang karon wa magpasabot nga wa siyay iyang kaugalingong gamhanang mga koneksiyon.
Iyang gibutyag nga usa sa wa masulbad sa PNP mao ang kasong pagpatay sa iyang ig-agaw. Nga ig-agaw sab sa asawa ni Kongresista Paolo Duterte. Ang igsuon ni Bise Presidente Sara Duterte Carpio ug anak ni kanhi Presidente Rodrigo Duterte.
* * *
- Latest
