Katekesis No. 106

Ang Pag-Ampo ingon nga Dakong Panalangin

Si bisan kinsa nga nihatag sa iyang kaugalingon alang sa usa ka pag-ampo ang makadawat og dagkong panalangin.

Dili tungod sa madawat nga panalangin ingon nga bunga sa pag-ampo. Hinunoa, ang pagka-anaa diha sa presensiya sa Dios.

Ang kalag nga anaa sa Diosnong Presensiya dili ba gipanalanginan man? Ngano? Ang mosunod nga mga rason maoy tubag:

1.  Kun anaa ka sa presensiya sa Dios mamahimong okupado ang imong hunahuna sa mga butang Diosnon. Aron ang Dios mamahimong okupado pud sa imong mga tinguha.

2.  Kun anaa ka sa presensiya sa Dios, nan, mamahimong puno ang imong pagbati nga iya sa Dios. Ang Gugma nga nahimong mas molabaw pa sa tawhanong pagsabot niini.

3.  Kun anaa ka sa presensiya sa Dios mamahimong mas makidiosnon ang imong binuhatan ug ang imong inadlaw nga pagsaksi makapadasig sa kadaghanan sa pagtuo nga dunay Dios diha sa ilang ilang kinabuhi.

Ning panahon sa kwaresma atong batasanon ang pag-ampo. Pinaagi sa:

1.  Pagpasalamat matag adlaw labina sa sayong kabuntagon

2.  Pagdayeg sa Dios gumikan sa iyang gamhanang pag-amoma kanato.

3.  Pagpangayo nga ihatag ang tinud-anay natong panginaanglan ug dili lang ang mga butang bunga sa atong kapritso.

Ang pag-ampo ingon nga panalangin kun atong pangayoon uban ang dakong pagsalig ang makapaduol kanato ngadto sa Dios. Mao kini ang mas mahinungdanon.