Kontraktor ipangkiha

Didto sa ubang kanasuran, kon adunay “ongoing road project” nga makahasol sa mga motorista, ang kontraktor nagbutang na og pahibawo didto pa sa layo kabahin sa proyekto.

Ang tumong niini aron nga ang mga motorista, mga drayber og sakyanan, makahukom na daan kon motipas ba sila og agianan kon matimbang-timbang nila nga ma-traffic sila.

Sa ubang nasud, tunga sa kilometro pa lang paingon sa dapit nga adunay road repair project, may pahibawo na, ug may lain pa gyud nga gibutang sa duol na sa proyekto.

Apan dinhi sa ato, hilabihan ka abusado sa ubang kontraktor nga di na gani magbutang og plakard aron mahibawo ang publiko kon unsa ang maong proyekto, ug kon kinsa ang kontraktor.

Ang lagda naglatid gyud unta nga ang kontraktor magbutang og pahibawo pinaagi sa billboard, sa nga’n sa kontraktor ug sa ilang contact numbers, ingon man kon kanus-a kini mahuman.

Tungod sa abuso nga gihimo sa mga kontraktor og road/drainage projects, nakahukom si Atty. Koko Holganza, ang chairman sa Cebu City Traffic Management Board nga ipangkiha kining mao nga mga kontraktor.

Plano gani ni Atty. Holganza nga iapil niya’g kiha ang mga tinugyanan sa Department of Public Works and Highways (DPWH) ug Department of Engineering and Public Works (DEPW) nga wa magpakabana sa maong kapakyas sa mga kontraktor pagtuman sa tukma unta nilang pagabuhaton. Buyno, paabuton nato kon unsay kalamboan niini.

* * *

Ang pagpataka og kawot sa mga karsada ug wa tumana sa mga kontraktor ang mga lagda, sama kon asa ibutang ang mga hinabwa nga lapok, makabalda kini sa pag-agi sa mga sakyanan.

Kon ang hingtungdang ahensiya, ang DEPW ug DPWH, wa pa magduka-duka sa ilang katungdanan ug gisuperbisahan pa unta ang maong mga kontraktor kon giunsa nila pagtrabaho, wa unta kaayo’y problema.

Sayonan ka nga dunay ubang kontraktor nga sayon-sayon ra nga moguba sa atong mga karsada ug dili nila ayohon sa pagsemento pagbalik?

Usa niini kining JFAP Construction. Tan-awa ang Veterans Drive gikan sa Lahug paingon sa Busay nga anaa ang ilang proyekto sa MCWD, dunay mga dapit nga gisemento na kuno nila pagbalik ang karsada, apan dunay mga lungag nga wa giapil.

Sa ako na nga giingon, ang nindot gyud nga maghimo og grupo nga maglibot-libot sa tibuok syudad, ug pangtapakan ang mga libaong aron hapsay ang pag-agi sa mga sakyanan.

Mao na nga makaingon ko nga kadaghanan sa mga tawo nga gisweldohan sa kagamhanan, ang sweldo ra ang giapas. Kon ang tanang sinweldohan sa kagamhanan motrabaho lang base sa ilang mga tahas, wa gyud unta’y magbagulbol.