Papel sa ginikanan

Niay pasumbingay nga gitudlo ni Hesus ngadto sa iyang mga tinun-an tapos ibutang ang usa ka bata sa ilang atubangan. Siya miingon: “Akong ikapaniguro ninyo nga gawas magbag-o mo ug mahisamag kabataan, dili mo makasulod sa gingharian sa langit.” (Mateo 18:3)

Ang ipasabot dinhi ni Hesus paggamit og pulong ‘kabataan’ mao ang kinaiya sa usa ka bata, kinsa tungod sa kalinghod pag salabotan, kutob sa unsay isugo niini sa iyang mga ginikanan, sundon gayod sa bata. Inosente ang bata. Kulang pa sa kaalam.  Busa, obligasiyon sa ginikanan ang pag-agak niini subay sa kabubut-on sa Ginoo.

Ug kay kitang tanan, diha sa ato pa lang pagkahimugso nagdala na man og salang panulondon, kinahanglang magpabunyag gayod dayon. Kay human kita makadawat sa Sakramento sa Bunyag, nahanaw atong salang panulondon ug nahimo kitang anak sa Diyos.

Adunay panahon nga wala pay semana gikan sa pagkahimugso, ang bata namatay na. Di ba, anugon kaayo kon wala pa siya mabunyagi?

Niadtong elementariya pa ko, gipahibalo sab mi sa among titser unsa ka mahinungdanon ang pagpabunyag. Gipatilaw sab mig lusi sa dalunggan, kusnit sa bugan ug uban pang matang sa pagpasakit-disiplina. Pero wala gyoy maestrang gikiha sa ginikanan. Ingnon pa mi sa among Tatay’g Nanay nga basin nagpabadlong mi, maong nakusnitan! Sa laktod, supportive ang parents sa gibuhat sa teachers.

Ug wala mi magmahay. Nagtubo ming disiplinado ug mahadlokong makabuhat og salaod. Dili sama karon, nga masingkahan lag gamay ang bata sa maestra, pasakaan dayog child’s abuse. Kon makapatay kay nakahithit og shabu, ipagalam ra sa DSWD ug ultimong pangalan itago sa publiko. Kay basin kuno ma-trauma ang bata, kinsa ubay-ubay kanila gihimong illegal drugs courier sa mga sindikaktong bigtime. Diin, kon mabuloliyaso, dili mapriso kay sa Human Rights Law, protektado!

Papel sa ginikanan, nga disiplinahon ang nagtubo nilang mga anak. Nungkang hagkanhagkan-labanan bisag nakasala. Sakit man tuod ang pagbunal sa nakasala tang minahal, pero kinahanglang dukdokon-unaton man gayod ang napikong lansang aron kini matul-id.

Ang pagdisiplina usa ka matuod nga gugma. Makapalikay sa pagpakasala. Samtang ang pagpaundayon o pakig-abin sa nakasala, sa kaugmaon sa mga bata seguradong makapa-Yawa!

Unta, maoy ipasunod ang mga buhat nga makapahimuot sa atong Ginoo.