Cebu City himoong maritime hub

Kini ang gitinguha karon sa grupo nga naglangkob sa maritime industry nga haum usab kaayo sa vision sa Cebu City nga mahisama sa Singapore.

Niadtong nakalabay’ng adlaw nitambong ko sa press launch nga gipahigayon sa usa sa mga hotel sa Lahug nga gipasiugdahan sa mga naglangkob sa industriya kauban mismo ang regional director sa Marina Region 7 nga si Engr. Emmanuel Carpio.

Mahitungod kini sa Cebu Maritime Expo 2023 nga gikatakdang ipahigayon sa buwan sa Abril diin ang venue sa kalihokan mao ang SRP.

Matud sa tagdumala nga mokapin sa usa ka libo ka mga participants ang motambong sa tulo ka adlaw nga kalihokan, dili lang sa mga bigatin nga anaa sa shipping industry kon dili tanang mga tawo nga adunay interest sa panagatan.

Kini ang labing unang maritime expo sa Sugbo nga maghatag og kahigayonan sa pagpakita sa katakos sa atong industriya nga nagkinahanglan usab og hugot nga suporta sa tanang mga stakeholders ilabi na sa lokal nga kagamhanan.

Showcase kini sa nagkadaiyang sakayan sa kadagatan nga dako kaayo og matabang sa kalamboan sa usa ka dapit sama sa dakbayan sa Sugbo.

Sa natad sa turismo ug negosyo nga mosangpot usab sa pagkamugna sa daghang kahigayonan sa panarbaho kong mapalambo ang tinguha sa grupo.

Ang dakbayan sa Sugbo adunay programa ubos sa tourism commission ni Konsehal Joy Pisquera nga nagpalambo sa sunset cruise sa SRP nga gitinguhang makakabig sa mga turista.

Perfect tourist spot ang SRP kong himoong sentro sa maritime tourism kay nindot ang talan-awon tungod usab sa iconic structure sa CCLEX ug makuha usab ang sunset.

Gawas niini, adunay international seaport ang Cebu City nga makapadayon sa international cruise ship, nganong dili man nato kini gamiton?

Ang martime industry usa sa napiang dihang niigo ang pandemiya apan  karon nakabangon na ug angayan lang suportahan aron mas molambo pa.

Magdala kini og dakong kontribusyon sa atong ekonomiya, kong buhi ang ekonomiya mas makatabang sa panginabuhi sa katawhan.