EDITORYAL - Gipasa ra ang responsibilidad

Bag-o na karon ang matud pa patakaran sa Mandaue City Public Market, ang mopalit og isda nga magpahimbis ug magpalimpyo niini, kinahanglang dad-on mga biya ngadto sa ilang mga panimalay. Ang rason, aron kuno mamenusan ang kabaho sa merkado.

Samtang maayo ang tumong niini kay tinuod mamenus-menusan ang kabaho sa merkado kay wala nay mga biya sa isda, dili kini makasulbad sa kinatibuk-ang kalimpyo sa siyudad.

Mura lang og gipasa sa mga naa sa gobiyerno ilabi na sa market authorities sa siyudad sa Mandaue ang responsibilidad pagmentinar sa kalimpyo sa ilang merkado. Natural mobaho gyud ang fish market kay wala may klaro ug epektibong nahunahunaang sistema ang mga tagdumala sa merkado.

Kun ang mga biya nga susama niini duna palay klarong butanganan sama sa compost pit, mahipos kini og tarong ug dili mobaho sa merkado.

Ang compost pit mahimo sab nga source sa abuno para sa mga tanom. Duha untay igo niini, likay sa baho ang merkado unya limpyo, duna pa gyud abundang suplay sa abuno ang mga pananom sa siyudad ug ingon man sa mga barangay nga nagkinahanglan niini/.

Ang himbis, hasang ug tinai sa isda dili na maayong pagkaon sa mga binuhing hayop sa panimalay sama sa iro ug s airing, kay magdaut ang tiyan niini ug magkaproblema na hinuon ang tagbalay.

Ikaduha kun way mga binuhing hayop sama anang mga nagpuyo og condominiums o boarding houses adto kini mobaho sa sud sa ilang gipuy-an.

Ang uban ani nila, di nalang gyud mamalit og isda sa merkado, kinsa may nawad-an og kustomer aning kalakiha?

Maayo lang kun maayo ang koleksyon sa basura sa kabarangayan, maayo ba ug regular ba silang nagkolekta?  Kumusta man ang waste segregation nato mga basura diha sa mga barangay, maayo ba?

Ang mga biya sa isda kun dili mahipos og tarong mobaho dayon, maayo lang kun dunay refrigerators ang tanang panimalay kay mahipos pa hangtud duna nay mangolekta sa basura.

Dili ba kaha hinuon ang mahitabo ani, ang mga himbis, hasang ug tinai sa isda ibilin nalang bisan asa sa mga mamalitay og isda, unya pangtangagon sa mga iro ug iring, magpasad na hinuon kini sa kadalanan ug manimaho ang palibot.