Ang pagbati

Gumikan sa pangabubho, gigulgol sa 58-anyos nga tindiro og tubig nga si Edwin Salazar Lumacad ang liog sa 54-anyos nga tindira og mangga nga si Bernadette Zamora nga kanhi niyang kapuyo.

Ang pangabubho ni Edwin Lumacad nagsugod niadtong Sinulog dihang iyang nakit-an si Bernadette nga nagsige og sinyas ngadto sa laing lalaki nga mamaligyaay og tubig bisan og anaa siya sa iyang likod.

Si Edwin miasoy nga daan na niyang gipahimangnoan si Bernadette nga dili magsige og tan-aw og guwapo ug macho kay masuko siya pero motan-aw gyod og guwapo ilabi na og macho.

Pasakaan sa polis og kasong frustrated murder si Edwin samtang ang biktima nga si Bernadette anaa pa gihapon sa tambalanan ug anaa pa gihapon sa peligro nga kahimtang. Bunga kini sa gugmang nag-uros-uros.

Samtang perting tiyabaw sa 18-anyos human niya makita ang nagbuy-od nga patay'ng lawas sa iyang 58-anyos nga uyab nga gibanhigan patay samtang nagsakay kini sa iyang motorsiklo niadtong Lunes sa alas 5:00 sa hapon sa may eskina dalan Colon ug Panganiban. Ang gugma ug pagbati dili gyod magpili bisan pa sa edad.

Didto sa nasud nga Singapore, usa ka lalaki nga gusto unta nga makabaton og romantikong relasyon sa usa ka babaye mipasaka og kaso ug nanagayo og tulo ka milyon dolyares ($3M) kay nadaut ang iyang reputasyon ug nakamugna kini kaniya og trauma, depresyon ug impact sa iyang kinabuhi human niya masayri nga gusto lamang diay sa babaye nga makighigala kaniya.

Gawas sa tulo ka milyon dolyares, nangayo usab siya og $22,000 tungod sa paglapas sa babaye sa ilang kasabotan nga palamboon pa ang ilang relasyon.

Ang kaso natanggong human si Mr. K Kawshigan misugot nga mopaubos sa counseling apan human sa usa ka tuig ug tunga, si Kawshigan dili gayod makadawat nga si Ms. Nora Tan dili gusto nga sila magka-uyab hinungdan nga iya kining gipasakaan og kaso. Kuyaw ning maong pagbati og moabot ni dinhi sa ato.