Pagtabon sa lapad nga kalisod
Ang pagkabisto nga gituktok sa kapolisan ang mga pinuy-anan sa mga mag-uuma sa sibuyas nga nitug-an sa Senate Committee on Agriculture nga dunay kaubanan nga naghikog tungod sa kapait sa ilang kahimtang makapa-alarma nang daan.
Mas makapa-alarma pa gyod nga nisuway ang mga polis og papapirma og dokumento nga mobakwi sa kasayuran nga gihatag sa mga mag-uuma ngadto sa mga senador. Kon militante pang mga grupo ang nibutyag sa panghasi sa kapolisan, mahimong isipon lang nga propaganda. Di sama kasayon nga isalikway kay ang tinubdan mao si Senador Imee Marcos.
* * *
Mas makapatingkag pa gyod sa dunggan ang dugang kasayuran nga gibisto sa maguwang ni Presidente Ferdinand Marcos Jr., nga gustong magpatawag nga Super Ate ng Pangulo (SAP): Ang nagsugo sa mga polis sa pagsungko sa mga mag-uuma sa Bayambang, Pangasinan mao ang Department of Interior and Local Government (DILG) ug ang National Task Force to End Local Communist Armed Conflict (NTF-ELCAC).
Sukwahi sa ilang naandan nga pa-goryo-goryo sa nangaging mga pasangil nga naka-apiki nila, nikumpisal dayon ang Police Regional Office sa Pangasinan nga tinuod ang kasayuran ni Senador Marcos.
* * *
Kon di pa lang sa iyang apelyido, hagbay ra tingali si Senador Marcos nga gisumpay sa NTF-ELCAC sa nagkataas nilang listahan sa mga komunista. Lahi sa kapaspas nilang ni-red tag sa mga personalidad nga wa mauyoni, nga naglakip karong bag-o ni Baguio City Mayor ug retiradong Heneral Benjamin Magalong morang nakatulon og dakong liso sa santol ug natuk-an ang mga turutot sa NTF-ELCAC.
Pero kadudahan kon si Senador Marcos makabadlong sa ilang raket paghingan nga komunista sa tanang mosukwahi sa linya sa gobyerno.
* * *
Samtang kahibudngan ang papel ni Senador Marcos sa pag-unay og saway sa pipila ka lakang sa administrasyon sa iyang manghod, apil nang kataphaw sa liderato sa Department of Agriculture (DA), labing dakong eskandalo ang lapad nga kampanya sa gobyerno pagtago sa kalisod sa katawhan.
Imbes hatagan og sulbad ang mga problema, gipaagi sa lipat-lipat (baratong asukar ug sibuyas bombay sa Kadiwa Centers, nga mas lisod pangitaon kay pila ra ka buok ug tua ra sa Metro Manila) ug hingpit nga pagtabon (paghasi sa mga nitiyabaw ug pagpabakwi sa ilang pasangil).
* * *
- Latest
