Angay’ng sundon

Naikag ko sa gisugilon kanako ni Ricky Ballesteros kabahin sa kalihokan sa mga dancing contingents ug sa ilang mga kaubang lumolupyo didto sa isla Bucas Grande sa Surigao.

Nagpuyo sila sa usa ka gamay’ng sityo nga gitawag og Kapihan, nga sakop sa Barangay Sering, lungsod sa Socorro, Surigao del Norte.

Ang maong mga lumolupyo nga nagpuyo sa dapit nga kaniadto plantasyon sa kape, nagtinabangay aron matukod ang gamay’ng komunidad.

Duna sila’y gihimo nga park, nga nahimutang ibabaw sa bungtod nga kon imong tan-awon mora’g gisemento, apan diay hinimo ra sa anapog nga gibantok.

Nabuhi sila sa pagpanguma ug sa pagpangisda, apan nagkasabot sila nga maghiusa aron nga makamugna sila og usa ka malinawong kumunidad.

Ang ilang lider nga giila nila nga Senior Agila, gitahod nila kay nasabot man usab nila nga aduna kini nakat-onan. Gikaila ni Ballesteros ang lider sa grupo dihang gikuha siya nga judge sa gipahigayon nga Marajao Karajao Festival sa Surigao.

Ang grupo nga Omega de Salonera nga gipangulohan ni Senior Aguila maoy grand champion sa festival sa Surigao, bisan og nakasugat sila’g aksidente pagtabok nila sa siyudad kay nalunod ang gisakyan nilang barko.

Gisuwat ko kini aron kapanaminan sa kadaghanan nga kon maghiusa kita, maangkon gyud nato ang kalampusan. Ikaduha, nindot gyud nga dili kita magtinapolan.

Ang mga sakop ni Senior Aguila, alas tres pa sa kadlawon momata na aron nga mosugod na sa inadlaw nilang gimbuhaton sa pagpanguma ug pagpanagat.

Dili sila moinom og mga ilimnong makahubog, ug bisan ang mga tam-is nga ilimnon, sama sa softdrinks. Ang ilang mga tupi sa buhok mugbo, bisan ang ilang mga babaye.

Kon duna sila’y mga trabahoon nga para sa publiko, tabangan nila nga dili na magpaabot nga tabangan pa sila sa kagamhanan.

Sama sa dakong park nga gihimo nila ibabaw sa bungtod, sila maoy naghimo. Nakita man ninyo ang higanteng agila nga ilang props sa pagsayaw sa SRP, susama gyud sa tinuod nga langgam, mokapa-kapa ug molihog ang ulo.

Bisan og kadaghanan kanila wa intawon makatabok sa mga dagkong siyudad, sama sa Cebu, apan mga utokan sila ug dili palaaway.

Ang ilang dapit dili mabasta-basta nga masulod dayon kay aduna sila’y mga sakop nga gidestino aron magbantay, diin sitahon ka nila kon mosulod ka sa ilang dapit ug pangutan-on kon unsay imong katuyoan.

Kanindot kaha kon ingon man kita kanila og pamaagi? Gani, kon wa pa maaspalto ang venue sa SRP, kataw-an ra nila kay anad sila niini.

Sa ilang dapit way agianan nga aspalto, way gisemento apan sila nabuhi ug naanad na sa pinobre nga kalihokan.