Milagroso

Ugma, saulogon na usab sa katawhan ang kapistahan ni Señor Sto. Niño. Gani, karong hapon, bisan og magbunok ang uwan kaliboan ka katawhan ang mokuyog sa prosesyon sa imahen ni Sto. Niño.

Usa ko sa mokuyog sa prosesyon nga dili gayud magpandong, bahala na og magkuray ko sa katugnaw kay panaad nako nga mao kini ang akong pagabuhaton kada prosesyon sa iyang imahen.

Gisalig nako ni Sto. Niño ang akong kinabuhi dihang naaksidente ko didto sa national highway sa Sitio Bakhaw, sa Barangay Catmon-Daan, lungsod sa Catmon.

Nagsakay ko’g motor paingon dinhi sa siyudad ug gidam-agan ko sa usa ka Prime mover nga sakyanan nga nagguyod og taas kaayong trailer. Ang pangunahang ligid sa Prime mover miligis gyud sa akong paa samtang naghigda na ko sa karsada.

Makapakitbi sa atay ang maong talan-awon. Dangog ang karsada kay nag-uwan, ug nakasinggit ko’g tabang kang Sto. Niño dihang nagpaingon na kanako ang higante nga sakyanan.

Nakanlat ang akong gisul-ob nga karsones dihang ang akong paa ug bitiis gilatayan sa ligid, apan tungod sa pagtabang ni Sto. Niño wa mabali ang akong bukog ug nakaangkon ra ko og pangos.

Ang mga nakakita sa hitabo nagtuo na gyud nga patay na ko kay dako kaayong sakyanan ang miligis kanako. Nakabantay ko nga miuntol ang ligid nga milatay sa akong paa. Nagtuo gyud ko nga mamatay na ko niadtong higayona.

Apan nakabarug ko nga daw sa wa ra’y nahitabo ug napasiga ang mga mata sa mga nakakita. Ako pa’y mikuha sa lisensiya sa driver, ug gitugyan nako sa mga polis nga taud-taud miabot aron sa paghimo sa imbestigasyon.

Samtang nakupog ang akong motor nga gisakyan, ako igo ra nga nakaangkon og garas sa bitiis ug tiil. Viva, Señor Sto. Niño!

Mao na nga karon, kanunay ko nga iuban ang gamay’ng imahen ni Sto. Niño sa akong paglakaw.

Daghan ko og mga gipangayo niya nga iya gyud nga gihatag kanako. Dako kaayo ang akong pagsalig kaniya nga iya ko nga tabangan sa tanang higayon.

Inig mata nako sa buntag, hagkan dayon nako ang imahen ni Sto. Niño ug magpasalamat ko kaniya. Kamo nga nagbasa karon niining akong kaagi, sunda ko ninyo, himoa usab ninyo si Sto. Niño nga inyong abyan.

Kon inyo kining himoon, sigurado ko nga tabangan mo niya kanunay, ilabi na panahon sa inyong kalisdanan. Mao kini ang rason nga bahala’g kapoy ug tugnaw, kon mag-uwan man, antoson nako ang pagkuyog sa prosesyon karong hapon.

Usbon ko, salamat kaayo Señor Sto. Niño!