Dako’g gasto bisan bulay-og

Nagtuo si Finance Secretary Diokno nga ang sayo nga pagpasar sa 2023 budget makatabang sa pagpadasig sa ekonomiya kay kini nagkahulogan nga sayo usab maka-implementar ang nasudnong kagamhanan sa mga programa ug proyekto.

Dili ang kasayo o kalangan sa pagpalabang sa budget ang suliran. Naghinobra’ng burukrasya ingon man higpit nga lagda sa COA ang lain usab nga hinungdan sa kalangan pag-implementar sa mga proyekto. Haum ang panahom nga, “anaa na sa iyang subok ang kakulang sa katakus sa gobiyerno nga sa bisan unsang gimbuhaton, iya kining buhaton sa labing dako’ng gasto ug sa labing bulay-og nga paagi”. May’pag moligeed!

‘One plus one = zero’

Sumala sa DOH, maapektohan ang COVID-19 vaccination program sa nasud kon dili na malugwayan ang ‘State of Calamity’ kay dili na man mahimong mopalit og dugang bakuna pinaagi sa Emergency Use Authorization ug mamemosan na usab ang mga vaccinators. Dili kaha alibi lang ang maong pamahayag. Kanunay lang nga gigamit ang kaayohan sa katawhan isip alibi sa mga palpak sa kagamhanan. Matud pa sa pagya, “Kon magpunay’g ihap ang kagamhanan sa iyang alibi inay sa mga nabuhat, ang “usa pun-an og usa,” kanunay nga mosangpot sa wala kon zero.” Fezteleern!

Gantihan ang iresponsable

Napanglantawan sa Department of Agriculture ang pagkunhod sa presyo sa sibuyas-bombay sa tunga-tunga sa Enero 2023, taliwala kuno sa ilang paningkamot nga modagsang ang suplay ug sa gipaabot nga ting-ani. Lahi ang pagsabot sa akong amigo ni’ng pamahayag sa DA. Matud pa niya, “Mobarato na kay nahurot na man pagbaligya ang suplay sa mga smuggler nga kunsabo ra usab nila. Alaot ang mga lokal nga mag-uuma kay pasagdan na lang sila sa kagamhanan pagdispatsar sa ilang produkto.” Ni’ng panahom sa akong amigo, haum ang pagya nga “Samtang ang ‘free market’ nagsilot sa mga iresponsable, ang kagamhanan nag-ganti usab kanila.” Madahaan!

Dili ganaha’g kompetensya

Giangkon sa nadakpan nga high-value drugs dealer nga si Juhndel Abanid nga ang tinubdan sa iyang gipayuhot nga drugas mao ang iyang contact sulod sa Cebu City Jail.

Dakong tampaling sa kapolisan kon ugaling tinuod man kining pangangkon sa suspetsado. Tataw ni’ng kahimtanga nga sa suliran sa ilegal nga druga, mismo’ng mananakop ra usab ang nagpasiugda. Mao kana’y giingon nga, “Ayaw pangawat, ayaw panlimbong ug ayaw pamaligya’g ilegal nga drugas. Mapriso ka gayod kay ang kagamhanan dili ganahan kon adunay kompetensya.” Pagkatoytoy!

Wala’y sulod ang tiyan

Adunay giproponer nga balaodnon si Cebu City Councilor Rey Gealon nga magmando sa mga tag-iya’g restaurants ug uban’g tindahan sa pagkaon paghatag og libre’ng mainom nga tubig ngadto sa ilang mga kustomer sa tuyo nga maseguro nga mahatagan og limpyo, luwas ug libre nga tubig ang mga turista ug kustomer. Nabalaka ang akong amigo sa sangputanan sa among ordinansa. Basin kuno mangayo usab ang kustomer og libre ‘ng pagkaon ginamit ang rason nga “makadaot sa tawo ang moinom og bugnaw’ng tubig nga walay sulod ang tiyan.” Muleeng!

Happy New Year Everyone!!!