Way kinutoban nga kalbaryo
Ang pasahero og barko moapil og upat ka linya sa pantalan una makaabot sa iyang destinasyon:
• Unang linya aron pagpalit og tiket (nga kon tingsakay sal-otan og scalpers nga motanyag sa nihit nga tiket bugti sa utap ug ubang palaliton nga gipilu-pilo ang presyo);
• Ikaduhang linya aron pagbayad og terminal fee (nga lisod subayon diin paingon kay alimuot ang passenger terminal, hugaw, baho ug guba ang mga pansayan ug way agas ang mga gripo);
• Ikatulong linya aron pagkuha og seat number; ug
• Ikaupat nga linya aron pag-check-in sa bagahe.
* * *
Lisod sabton nga bisan sa kasayon sa bag-ong mga teknolohiya nabiyaan gihapon sa panahon ang labing batakan nga mga aspeto sa operasyon sa mga barko. Sama sa gihimo sa mga kompaniya sa ayroplano, nga napugos ra sa pagsanong human sa taas ug kutas nga kumbati batok sa mga ahensiya sa gobiyerno ug mga pasahero, mahimong duha na lang ang linya sa pantalan:
• Una para sa pagpalit og tiket (nga maglakip sa plite, terminal fee ug bayad sa bagahe); ug
• Ikaduha para sa check-in sa pasahero ug sa bagahe.
* * *
Ang taas nga mga linya sa check-in kapamub-an, kon di man kalikayan, pinaagi sa pagdugang sa mga trabahante ug check-in counters atol sa mga bakasyon sa Pasko, Bag-ong Tuig, Semana Santa, Kalag-Kalag ug ubang tingdagsa sa mga pasahero. Mahimo sab nga ipatuman ang online check-in para sa mga pasahero nga dunay internet access.
Nga wa pa ni himoa bisan mag-2023 na maoy ebidensiya nga karaan ang panghunahuna sa mga tag-iya sa mga barko, bisan kasagaran mga batan-on nang nibanos sa ilang katiguwangan.
* * *
Labing di masabtan mao ang way kamatayon nga kaguliyang sa mga pantalan. Nganong wa pa man gihapon mabadlong ang scalpers nga kakonsabo sa ticket offices sa mga barko ug mga drayber sa taxi nga manlubag sa mga pasahero? Nganong wa pa may sistema paghimong hapsay sa lumbay sa mga sakyanan nga mohatod ug mokuha og mga pasahero?
May sukaranan ang pagtan-aw sa mga pasahero sa pantalan isip wa kinahanglanan pero way kinutoban nga kalbaryo–nipaantos nila sa gagmay pang bata ug, salamat sa kataphaw sa mga tagduma, mahimong padayon nga mohasol sa umaabot nga mga henerasyon.
* * *
- Latest
