Ang kalisod gihimong puhonan

Pipila ka oras gikan karon saulogon na nato ang adlaw nga gihimugso ang atong Manunubos nga si Hesus. Siguro pabonggahay ang selebrasyon karon kay mora'g natingob karon human sa duha ka tuig nga restriction sa  pandemic ug niadtong bagyong Odette.

Bongga alang sa mga adunay igong makuot sa bulsa apan sa mga tawong wala gyuy makauot, aw makasaulog man gihapon pinaagi sa paghatag og panahon alang sa pagdayeg ug paghimaya sa atong Ginoo.

Dili man masukod sa kalami ug kadaghan sa pagkaon ang diwa sa Pasko kon dili ang paghatag og bili sa isig ka tawo pinaagi sa pagpaambit ngadto sa mga tawo nga talagsa ra gyud intawon nakatilaw og lami o wala.gyud gani nakakaon og lami nga pagkaon.

Samtang  nabantayan nga nidagsa karon ang mga tawo nga nanaygon sa karsda ug nanaka usab  og mga sakyanan gadala pa gani og mga sobre nga gitatakan pa og pulong sa ilang komunidad.

Ok ra man unta ni nga makapaambit bisan gamay aning mga tawhana kay panahon man sa Pasko karon ayawat nalang makapalit sila og lami lami nga pagkaon.

Apan mura’g nanghinubra naman pud ni sila kay gikan sa bata hangtud na sa mga tiguwang anaa magyampungad sa karsada, inay malooy ta maglagot naman hinuon pwera gaba lang.

Gihimong puhonan ang kalisod sa ilang diskarte, hinuon naa man gyu'y mga naglisod nga tabangonon sama nianang mga masakiton apan kining mga nagpakilimos sa mga karsada nagpakita lang sa ilang katapolan.

Wala man nato hukmi kining mga tawhana apan tan-awon usab nato kong tabanganan ba kini sila o ato lang gipasamot ang ilang pagkatapolan pinaagi sa paghatag og tabang.