EDITORYAL - Ang seryosong hulga sa ASF

Kinahanglan pang pahugtan sa mga otoridad ang pagbantay sa mga pwerto niini gikan sa mga tugpahanan hangtud sa mga pantalan dinhi sa Sugbu batok sa palusot og mga karneng baboy ingon man de lata gikan sa mga lugar nga naigo sa African Swine Flu.

Samtang tuod hugot  ang monitoring sa mga otoridad sa mga dagkong siyudad sa Sugbu apil na ang inspeksyon sa mga estante sa mga tindahan, unsa kaha sab kahigpit ang gihimo sa mga naa sa mga lungsod?

Sigurado ba nga walay mga bentahoso ug hakog nga mga negosyanteng wala mosekreto pagpalusot ug pagbaligya niini diha sa ilang mga tindahan?

Ang ASF usa ka matang sa sakit sa mga baboy, taas kaayo ang mortality rate niini kay sagad sa matakboyan mamatay gyud.

Sumala pa sa mga report, ang kagaw nga nakaingon sa ASF dili mamatay bisan maluto na ang karne o de lata kay magpabilin lamang kini. Nagpasabot nga bisan ang lamaw o biya nga pagkaong dunay ASF dako kaayo og purohang makaon sa ubang mga hayop ilabi na sa baboy ug diha na magsugod ang tinakdanay sa uban.

Samtang nagkaproblema na ang ubang mga probinsya dinhi sa nasud tungod sa ASF, napadayon sa Sugbu ang  pagmentinar nga zero-ASF dinhi sulod na sa pipila ka buna.

Ang maong sakit  nakapalup-og sa industriya sa pagpamuhi og baboy dili lang sa mga rehiyon sa Pilipinas kondili hasta na sab sa ubang mga nasud nga dunay dakong hog raising industry.

Dinhi sa Sugbu bilyones ka pesos ang industriya sa hog raising o pagpamuhi og baboy ug liboan ang nagsalig niini.

Ang mga baboy nga matakboyan niini kun dili man mamatay dayon sa maong sakit, kinahanglan sab dayon nga patyon ug sunogon aron dili makatakod sa uban.

Tungod niini, bilyon-bilyon ang alkanse sa mga negosyanteng namuhi og baboy tungod aning ASF. Gawas sa mga namuhi niini, hasta sab ang mga naghimo og mga de latang mga produkto gikan sa baboy naapektahan sab.

Likayan lang unta sa mga negosyante ang pasekretong pagpamaligya og mga produktong gigamitan og karne sa baboy nga gikan sa mga rehiyon o nasud nga naigo sa maong sakit.