Gipatay wala  gi-COVID-19

Sa taho ni John Consulta sa 24 Oras gitug-an sa piniriso nga si Rodel Tiaga nga iya mismo nga nasaksihan o nakita ang pagpatay sa giingong drug lord nga si Eugene Chua sa Site Harry, ang designated quarantine facility sa National Bilibid Prison alang niadtong mga piniriso nga nagpositibo sa Covid-19.

Gitug-an ni Tiaga nga daghan nga high-profile nga piniriso sa National Bilibid Prison nga giingong namatay tungod sa Covid-19 wala diay  mamatay sa Covid-19 kon dili gipapatay.

Basi sa Medical Certificate, namatay si Chua tungod sa cardiopulmonary arrest tungod sa Covid-19 niadtong Hunyo 2, 2020. Si Tiaga nagsilbi nga orderly sa Site Harry.

Gisaysay ni Tiaga ang iyang nakita giunsa sa pagpatay si Eugene Chua. Ilang gitabonan og plastic ang ulo ni Chua ug gibira kini sa duha ka tawo hangtod nga natumba si Chua sa ilang atubangan. Gani siya pa ang gisugo sa usa ka frontliner sa paghugas sa plastic nga gigamit sa pagpatay kang Chua busa iya pod kining gihugasan sa kasilyas.

Si General Gerald Bantag ang Director sa Bureau of Corrections nga gisuspenso tungod sa giingong iyang kalambigitan sa pagkamatay sa broadcaster nga si Percy Lapid.

Ang National Bureau of Investigation o NBI sa ilang kabahin mogamit sa testimonya ni Tiaga sa ilang imbestigasyon sa kamatayon sa mga high-profile nga mga piniriso sa National Bilibid Prison.

Gawas kang Chua, ang laing mga piniriso nga giingong namatay sa Covid-19 mao sila si Jaybee Sebastian, Francis Go, Willy Yang, Benjamin Marcelo, Zhang Zhu Li, Jimmy Kinsing Hung, Ryan Ong ug si Amin Buratong.

Ang kinabuhi dali ra gyud kaayo nga kuhaon kun adunay buot mokuha niini. Samtang misimpatiya ko sa pamilya sa mga piniriso nga gipangpatay, apan ato nalang pod nga ikondisyon ang atong kaugalingon nga ang gipangpatay mga high-profile pod nga tigpayuhot og gidiling drugas.