Salida sa kataphaw
Wa lang tuyoa, tungod tingali sa kakuwang og mapuslanon nga igsusulti ngadto sa iyang bisita, si Presidente Ferdinand Marcos Jr. niinsulto ni US Vice President Kamala Harris sa pagsugod nila og istorya sa Malakanyang:
· Nga kon mas taas pa unta ang panahon sa pagduaw ni Harris, isuroy unta siya ni Marcos sa labing nindot nga mga destinasyon sa Pilipinas; pero sagdi lang
· Kay moduaw man si Harris sa Palawan, makita gihapon niya ang pipila sa labing nindot nga mga talan-awon kay seguro man nga moadto siya sa resorts ug kabaybayonan.
* * *
Ambot gusto ba lang mopadayag sa iyang kahinangop sa pagduaw sa ikaduhang labing taas nga opisyal sa Estados Unidos, si Marcos wa kasabot sa mga implikasyon sa iyang gipanulti. Morang naglutaw sa iyang kaugalingong kalibotan.
Mora lang og way gubat sa Ukraine. Mora lang nga way paspas nga sulbong sa presyo sa tanang palaliton. Mora lang og way krisis sa kalibotanong ekonomiya. Mora lang og wa hasia ang iyang mga mangingisda ug kasundalohan sa West Philippine Sea. Mora lang og wa maapiking katawhan sa pagtago sa ilegal nilang katigayonan.
* * *
Maong angay lang nga diplomatikanhong tamparos ang sumbalik ni Harris niya: “That is not the life I’ve chosen these days.” Hinaot nga bisan gamay na lang napugwat si Marcos sa tinuod nga kahulogan sa tubag ni Harris. Isip mga opisyal sa gobyerno, di paglingaw-lingaw ang angay nilang unahon.
Hinaot nga way sukaranan ang kabalaka nga si Marcos nag-apas lang sa puwesto, uban ang tanang gahom, katigayonan ug pribilehiyo, pero way plano nga mosagubang sa kadako sa trabaho.
* * *
Gawas pa, ang iyang sungog ni Harris nibisto sa kataphaw sa iyang kasayuran. Isip host, nahibawo unta siya unsay tuyo ni Harris sa Palawan. Nga wa maapil sa iyang lakaw ang pagpabugnaw sa resorts ug pagtiniil sa kabaybayonan. Kon dili ang pagsakay og barko sa Philippine Coast Guard ug pakigsulti sa mga mangingisda. Nga pulos mga biktima sa pagpanghasi sa China.
Pero mas importante parang Marcos ang parties sa Malakanyang, lumba sa mga sakyanan sa Singapore ug pagsaulog uban sa mga bilyonaryo. Maong naunhan siya ni Harris sa paggunit og danggit sa Barangay Tagburos sa Puerto Princesa.
* * *
- Latest
