Saludo ko!

Akong saludohan ang mga sakop sa Cebu City PROBE Team ug ang ubang kawani nga misalmot sa clearing operation paghawan sa aseras sa Veterans Drive unahan sa Marco Polo Hotel.

Dugay na kaayo nga ang aseras sa maong dapit giukopar sa mga mapahimuslanon sa higayon, dunay hardware nga miukopar sa aseras pwerte ra ba nga mahala sa prisyo sa ilang baligya.

Kaniadtong Martes sa hapon, padayon pa ang clearing operation ug unta ipadayon nila ang paghawan sa maong lugar, kay kon pasagdan gud sila, di na gyud na mopahawa.

Awhagon nako ang PROBE Team nga human ninyo diha, isunod ang dapit sa Sitio Maracas, daplin gihapon sa Veterans Drive kay giukopar gihapon ang aseras.

Dayon, isunod nato ang dako nga project, ang pag-restore sa “missing road” sa Barangay Suba nga kabahin sa F. Rallos Street nga karon gipangtukoran na og kabalayan.

Salamat kaayo ni Mayor Michael Rama nga mihatag og pagtugot sa mga sakop sa PROBE Team nga mopatuman gyud sa pagpanghawan bisan kinsa pa ang maapektohan.

Apan yuna pa, maayong tan-awon diay sa PROBE kon nganong kanang fast food restaurant nga tigbaligya og grilled chicken sa eskina Osmena Boulevard ug F. Gonzales nga mora’g giukopar man ang aseras?

Dayon, isunod nato ang pag-restore sa mga aseras diha sa Taboan District, sama sa Lakandula Street, Tres de Abril, B. Aranas ug Tuti, nga karon gihinganlan na og Tomas Abella Street.

Kon ingon niini ang dagan sa administrasyon ni Mayor Rama, matuman gyud ang iyang gipangandoy nga ang Cebu City mahimo gyud nga susama sa Singapore.

* * *

Hinay kaayo ang kuryente diri sa among dapit sa bukid, unahan nga bahin sa Marco Polo Plaza Hotel. Nihangyo ko sa kaila nako sa Visayan Electric, apan giunya-unya ra ko.

Hilabihan ka paet kay mokalit lang pagpin-ok ang among mga suga, ilabi na gyud kon dunay mogamit og electric welding machines.

Ang akong opisina dunay aircon, apan malooy ko kay mokalit lang pagpin-ok nga magkagalkal. Kahilakon ko tungod sa kalagot ug kaguol nga sa dugang panahon low voltage sa amo.

Kay wa man gyu’y nahimo ang pagpangayo nako og tabang sa kaila nako sa Visayan Electric, napugos ko pagpangayo’g tabang ngadto sa presidente gyud sa VECO.

Dako ang akong pagpasalamat kang Engr. Raul Lucero kay gipangayoan ko niya og “post number” sa poste nga didto gikonektar ang akong kuryente, ug pagkaugma dayon giadto kini og ilang kawani.

Dayon pagkasunod adlaw, giadto na sab og laing kawani. Karon, nagbarog na ang bag-ong mga poste ug may alambre na nga gikutay, naghuwat na lang nga makonektar.

Pun-an sab nila ang transformer diri sa among lugar. Salamat Engr!