Seguridad sa pagkaon

Nanawagan si Presidente Ferdinand “Bongbong” Marcos Jr. sa mga lider sa kanasuran nga mitambong sa APEC Summit nga gipahigayon sa Thailand nga palamboon ang economic cooperation sa rehiyon sa Asia-Pacific human siya mipahimangno sa itom nga panganod nga mitabon sa seguridad sa pagkaon ug kausaban sa klima.

Pero dinhi ato nga isentro ang atong pagtagad sa seguridad sa pagkaon. Mahinungdanon man ang kausaban sa klima nga angayan usab nga tukion apan ato lang unahon ang pagkaon kay mapasmo ta kon wala tay pagkaon.

Tungod sa seguridad sa pagkaon, miinit ang lantugi nila ni Senador Raffy Tulfo ug Senador Cynthia Villar.

Gipunto ni Senador Raffy Tulfo ang paghimong commercial, residential ug industrial sa mga yuta nga pang agrikultura nga maoy hinungdan sa pagminos sa pagkaon.

Si Senador Cynthia Villar nga usa ka realtor ug maoy gipadungog ni Tulfo mirason nga naghimo sila og mga subdivision o balay sa mga siyudad ug wala sa mga umahan.

May punto usab si Tulfo tungod kay unsaon man nato sa paghatag og kaseguroan sa pagkaon kun ang mga umahan gipangtamnan na og balay.

Ibutang nato nga gihimo na nga subdivision ang mga umahan, sad-an ba niini ang mga Villar nga namalit og umahan aron tamnan og mga balay?

Sigun sa balaud ang tag-iya adunay mga katungod sama sa katungod sa pagkupot, paggamit, pag-enjoy sa bunga, pagbaligya ug pagkuha pagbalik.

Tungod niining maong mga katungod dili nato mabasol ang mga mag-uuma nga mibaligya sa ilang umahan ug labi na nga dili pud nato mabasol ang mga Villar nga namalit ug umahan nga  gipangtamnan nila og mga balay.

Aron maundang ang pagbaligya sa mga mag-uuma sa ilang mga umahan kinahanglan silang hatagan og saktong suporta sa ilang pag-uma ug ang Kongreso magpalabang og balaud nga magdili o maglimit sa pagbaligya sa mga umahan.