Anugon kayo

Tan-aw nako makuli na nga makolekta sa kagamhanan ang kapin sa P200 bilyones nga Estate Tax sa banay’ng Marcos atol sa administrasyon ni Presidente Bongbong Marcos.

Giilisan ni Presidente Bongbong ang pangulo sa Bureau of Internal Revenue ug gitudlo niya ang iyang suod nga abogado isip maoy bag-ong commissioner sa BIR.

Dili pa kaayo dugay nga si Atty. Romeo Lumagui Jr. gitudlo ni Presidente Marcos isip Deputy Commissioner sa BIR, ug kagahapon lang adlawa, nanumpa na usab si Atty. Lumagui Jr. isip bag-ong BIR chief.

Bi, hunahunaa pag-ayo kon ikaw pa ang gitudlo sa maong katungdanan, may kaisog ka kaha paghimo’g lakang aron pugson pagpabayad sa dakong buhisanan ang tawo nga maoy nagtudlo nimo sa pwesto?

Ang asawa ni Commissioner Lumagui, nga usa gihapon ka abogada, gikareport nga “trusted aide” sa asawa ni Bongbong ug sakop sa Araneta-Marcos’ law firm M & Associates.

Pagkadakong kwarta unta kon ang P203 bilyones makolekta pa sa kagamhanan. Apan unsaon man, si Bongbong man maoy gibotohan sa kinabag-an nga mga botante.

Sa sinultihan pa sa mga bugoy, “wa tay mahims” kay mao may gusto sa mga tawo.

* * *

Basta tinggawas na gani sa klase, pwerteng grabeha sa traffic diha sa Gorordo Avenue, ilabi na nga daghan kaayong mga sakyanan nga anha iparking daplin sa karsada atubangan sa Barangay Hall sa Lahug ug sa eskwelahan.

Ang mga ginikanan nga magkuha sa ilang mga anak, ingon man ang mga tinun-an sa Lahug Elementary School, sagad anha na moagi sa karsada kay dili man kaagian ang aseras.

Unsaon pag-agi sa aseras nga naa man nagbabag ang trak sa bombero nga wa kaayo makasulod diha sa grahe nga gitagana unta para sa sakyanan.

Ngano man? Gituyo man nga wa ipasu’d ang trak sa bombero kay dunay sakyanan didto sa unahan. Unya, may mga sakyanan sab nga iya tingali na sa mga opisyal sa barangay nga anaa nagbabag sa aseras.

Labaw sa tanan, ang ubang sakyanan anaa gyud giparking sa daplin sa karsada mao nga ang mga tawo, anha na gyud sa karsada maglakaw.

Gihisgotan na namo kining maong isyu sa Cebu City Traffic Management Board ug ang Association of Barangay Councils (ABC) maoy gitahasan sa pag-coordinate niini sa barangay Lahug.

Pinaagi niining lindog, akong awhagon ang mga opisyal sa Lahug ug ang kabomberohan sa Lahug detachment, nga dili unta nila babagan ang aseras ug ibakante nila ang karsada para sa mga pedestrian ug sa mga motorista.

Maghiusa kita para sa kahapsay sa atong trapiko sa Cebu City.