Abogada nga mas nisalig sa social media

Ang paghatod og impormasyon ngadto sa publiko usa ka dakong responsiblidad nga gikinahanglan nga insakto ug gikan gyud mismo sa tinubdan niini. Busa angayan lang nga hinabion ang mga nalambigit sa mga isyu aron malikayan nga maakusahan nga naghimo himo og estorya.

Isip tighatod og kasayoran gihimo namo ang tanan nga mapresentar ang estorya nga patas pinaagi sa pagpaminaw sa matag habig kay kon unsay tinuod alang sa uban bakak diay alang sa pikas kampo.

Makapadismaya ang gihimo sa usa ka nagpailang abogada sa usa ka ahensiya sa gobiyerno nga matud pa sa implementing sheriff sa demolition sa Lot 937 sa baranggay Apas nga nisuway kuno sa pagpahunong sa demolition.

Dili sa intervention sa abogada ang gikadismayahan sa mga tigbalita kon dili ang iyang gihimo nga gitudloan na hinuon niini ang mga sakop sa media nga didto lang mokuha og impormasyon sa social media kay napatik na daw tanan impormasyon sa kaso.

Ako siyang giingnan nga pagka iresponsable sa mga sakop sa media kong mag-refer lang sa social media sa mga kasayoran nga makuha. Gipasabot nako siya nga gikinahanglan gikan nila mismo ang kasayoran aron credible ang estorya. Dili tanan anaa sa social media tinuod, kay naghitak ra ba ang fake news sa kalibotan sa social media. Ako siyang gipasabot apan inay mosugot nga interviewhon nibalik gyud kini kay wala kunoy go signal sa Manila.

Dunay daghang klarohonon nga isyu nga sila lang ang makahatag. Una aduna ba silay katungod sa pagpahunong sa demolition nga wala man silay gihuptan nga Temporary Restraining Order o TRO. Ikaduha nakong gipangutanan niya kong asa o unsa nga grupo iyang girepresentahan. Apan nisamot og ok-ok si abogado nga dili na gyud hinuon motingog bisan moingon nalang unta nga “no comment.”

Alagad man unta siya sa balaod apan subo palandungon nga wala siya mosubay sa balaod dihang nisuway siya sa pagpahunong sa demolition nga pinasikad na kini sa hukom sa korte. Dili kumo opisyal siya sa nasudnong kagamhanan, mas gamhanan pa siya sa korte. Nainsultohan hinuon siya sa tubag sa beteranong court sheriff dihang giingnan siya nga bugtong ang korte lang ang makahunong sa demolition.

Nagsugod ang tensiyon sa vicinity sa demolition site tungod sa presensiya sa mga sundalo. Bisan og girason sa tigpamaba sa VISCOM nga igo lang silang nagpatuman og security measure nunot sa dakong kalihokan sa sulod sa kampo wala kini makapahupay sa ka kuryoso sa mga tawo kay lahi man gyud ang nahitabo sa gawas ilabi na nga miabot gyud ang abogada sa usa ka national government office.

In fairness sa mga molupyo sa Lot 937 wala kuno silay kasayoran sa presensiya sa mga sakop sa PAF, ug ang ilang gipanawagan nga mapadali ang paghatag kanila og relocation. Dili na ko molabtik sa issue sa lot 937 kay naa naman nay desisyon sa korte. Ang ako lang sa gihimo sa nagpailang abogada sa gobiyerno nga ambot lang kong nasayod ba kaha siya sa iyang gipanulti. Laliman kay didto na ka sa social media pakuhaon og impormasyon, mas nisalig siya sa social media kay sa iyang katakos isip usa ka opisyal sa guberno.  Kong dili siya mohatag og statement pila ra man sa pagbalibad. Dili man pud mamugos ang mga tigbalita. Kong wala siyay respeto sa media, bisan man lang respetohon niya ang iyang kaugalingon nga dili mohimo og mga lakang kong nahasupak kini sa balaod. Mahimong mo-claim siya nga pro-people apan gikinahanglan nga sakto siya sa bala nga ikapanalipod sa mga tawo nga iyang gidapigan.