Amores angay patagmon

Paborito sa Pinoy ang dulang basketball. Misamot dihang ang National Basketball Association (NBA) nga kaniadto dili makita sa telebisyon sa mga senior citizen, karon lab-as nang masaksihan sa tanan (mga bata man o tigulang) sa nagkalainlaing media outlet labi na sa You Tube channel.

Sa mga pamaagi nga nalatid sa balaod sa NBA, daghan kitag makat-onan.

Dili ingnon nga tungod kay usa ka big star ang player sa ilang team, gikonsiderar na kining dili mahilabtan.

Sanglit sa higayon nga makasala o wala makatuman sa mga lagda, silotan man dayon sa kadagkoan sa NBA. Kon dili pamultahog dinagkong kantidad, suspensohon ug pipila ka games, depende sa gibug-aton sa sipyat nga nabuhat.

Pero dinhi sa ato? Ang basketball court sa NCAA gihimong boxing ring ni John Amores.

Tiaw bay sa niaging Nobiyembre 8, wala pa gani matapos ang dula, namora na hinuon siya’g si Floyd Mayweather Jr.

Wala pa gani makapangandam ang kontra, gihasmagan ug gipangsuntok na niya ang players sa College of Saint Benilde Blazers (CSBB).

Dihadiha, duhay nanakdawon: Jimboy Pasturan ug Taine Davis. Matud pa, dili kini unang pagpanumbag sa Jose Rizal University (JRU) basketball player nga si Amores. Sa usa ka dula niadtong Hulyo 2022, diin wala tuyoa nasikhan iyang dughan ni Mark Belmonte, basketball player sa University of the Philipines (UP), gibaslan sab kini niyag siko sa bukobuko. Unya giliaban pa si Mark ug gisuntok sa nawong.

Naospital si Mark human matangtang mga ngipon ug gioperahan.

Pagka Hulyo 26, 2022, ang UP mipadalag sulat-pahibalo ngadto ni Dr. Vicente Katigbak Fabella, presidente sa JRU, bahin sa maong dautang gibuhat ni Amores, kinsa ilang estudyante. Pero wala kuno kini tubaga-aksiyoni ni Fabella.

Hinungdang milausag si Amores. Kay nagtuong untouchable, nanuntok na sab. Diin, kutob sa miuwang, gipangwakli.

Apan niining higayona, bisag nangayo pa siyag pasaylo sa iyang gihimo, wala lamang siya pahamtangig indefinite suspension sa JRU basketball team ug sa NCAA. Gipasakaan sab siyag kaso sa players nga iyang gipangsumbag.

Apil na kadtong kiha nga sa miaging Septiyembre pa gipayil sa abogado ni Mark.

War freak si Amores. Ang iyang taras dili pang-sports. Kon dili, pang-Bilibid. Busa, mas epektibo kon patilawon siyag prisohan. Aron motagam!