Abortion ug divorce

Giduso sa United Nation Humn Rights Committee sa nasud sa Pilipinas ang pagpalabang og balaud nga mag-usab ug magpalinya sa nasud sa komunidad sa kalibotan mahitungod sa katungod nga sibil ug politikal.

Apil sa sugyot nga giduso sa komitiba sa United Nation nga gilangkoban sa mga hanas sa tawhanong katungod mao ang paghimo nang dili kriminal sa abortion, paghimong legal sa divorce ug ang pagpalabang og komprehensibong balaud nga manalipod batok sa diskriminasyon.

Gisugyot sa United Nation Human Rights Committee nga usbon sa Pilipinas ang balaud nga nagpahamtang og silot sa mga babaye nga mopakuha sa ilang gisabak ug sa mga doktor o bisan kinsa nga mokuha sa bata nga gisabak.

Ang abortion wala itugot sa Pilipinas gawas lang sa ectopic nga pagsabak apan sigun sa pagtuon nga gibasihan sa World Health Organization aduna nay 610,000 ka mga kaso sa abortion sa Pilipinas sa wala pa ang tuig 2013.

Kun ugaling sanungon man sa Kongreso ang sugyot sa komitiba sa tawhanong katungod sa UN, tan-aw nako dili kini madali tungod kay gikinahanglan pa nga usbon ang Batakang Balaud sa dili pa mapalabang sa kongreso ang balaud nga maghimong legal sa abortion.

Ang Section 12 sa Article II sa 1987 Philippine Constitution nagkanayon nga ang Estado manalipod sa kinabuhi sa inahan ug gisabak niini gikan sa pagpanamkon.

Laing sugyot nga giduso sa komitiba sa tawhanong katungod sa hiniusang nasud mao ang paghimong legal sa divorce kay ang mga biktima sa domestic violence magpabilin sa gubot nga relasyon.

Gisugyot niini ang pagpadali sa paghimong legal sa divorce kay mao kini ang pamaagi sa nga mapanalipdan ang mga biktima sa domestic violence.

Sigun sa survey nga gihimo sa Social Weather Station sa tuig 2017 moabot sa 53 porsiyento sa mga gi-survey ang misuporta sa paghimong legal sa divorce. Basi niini, ang ubos balay balauranan sa boto nga 134 kontra 57 miuyon sa paghimong legal sa divorce apan gikatulgan lang kini sa Senado. Mouyon kaha ang Senado ning panahona?