Si Saqueo ug Kita Ikakatloag-usa nga Domingo sulod sa tuig

Mga Pagbasa: Kin. 11;22-12;1/Sal. 145/2 Tes. 1;11-2;2/Lk. 19;1-10

maayong balita

SUGILANON kini ni Saqueo usa ka Kobrador sa Buhis. Giila nga makasasala ug mahugaw diha sa mga mata sa katilingban.

Sayud kita nga ang mga Kobrador sa Buhis kaniadto giisip man nga mga public sinners. Tungod sa ilang opisina ingon nga mga kobrador sa buhis ug kaha tungod pud sa ilang binuhatan mismo.

Kasinatian

Mubo si Saqueo. Ang ubang mga bible scholars dunay ilang kaugalingong interpretasyon ug panlantaw. Mahimong si Saqueo mubo tungod sa iyang aktwal nga gitas-on.

Mao  nga nisaka siya sa kahoy nga sikomoro didto sa Jerico. Kining maong kahoy anaa pa hangtud karon. ang Jerico usa man sa pinakadugay nga siyudad nga anaa pa hangtud karon.

Sa laing bahin mamahimong sabton nga si Saqueo ubos ra kaayo ang panlantaw sa iyang kaugalingon. Ang mga pagtamay sa ubang mga tawo bisan pa man sa iyang kadato ang nakapahimo niyang ubos ra kaayo kun itandi kanilang nisaway kaniya.

Kining maong kahimtang hinunoa, wala makapadismaya kang Saqueo. Human niya madunggi ang Ginoo nga nagkanayon:

“Kanaog sa Saqueo kay adto ako modayon sa imong Balay karon!” Sa dihang nangaon sila si Saqueo nihimo ning maong panaad:

“Kun nakalimbong ako sa uban Ginoo ako silang ulian sa upat ka pilo!” makabag-o nga kasinatian! Makapadasig nga kasinatian! Usa ka makasasala nakaamgo nga duna diay siya’y mahimo pagtul-id sa iyang binuhatan.

Lihok

Karong semanaha mahisama unta kita kang Saqueo nga nagmalipayon nga atong nahimamat ang Ginoo diha sa atong kinabuhi. Ug unta, atong bayran ang bisan unsang mga sala nga atong nahimo.

Pangamuyo

Sa akong mga pag-ampo nahisama ako kang Saqueo nga naningkamot aron makita ka Ginoo. Apan sa maong pagpangita ikaw diay dugay ra nga nagpaabot Kanako.

Gitawag ko nimo ug gisangpit mo ang akong ngalan. Gidapit mo ako nga mosulod sa imong kasingkasing. Uban kanimo ako nagmalipayon ug pinaagi sa imong tabang ang tanang sayop akong tul-iron.

Salamat sa imong  gugma ug kaayo. Nakita ko nga ang tinuod nga kalipay wala diay diha sa kahakog ug pamintaha. Ang grasya mahimong matagamtam lamang diha sa pagkamanggihatagon.

Salamat Ginoo sa imong pagduaw sa akong kinabuhi ug sa pakigsalo Kanako bisan pa man sa akong kaubos. Amen.