Ang social media

Miangal ang kabanay sa nursing student nga giingong miambak gikan sa napulo ka andana nga school building sa usa ka universidad diin siya nagtungha tungod sa mga nanggawas sa social media nga ilang giingon nga pulos bakak.

May miingon man god nga naghikog ang 19-anyos nga tinun-an tungod kay nahagbong siya sa iyang midterm examination. May miingon pod nga tungod kini sa gugma ug uban pa.

Sa imbestigasyon nga gihimo sa kapolisan sa dakbayan sa Mandaue, nasuta nga maayo sa iyang academic performance ang tinun-an ug wala kini moapil sa uyab-uyab. Seryoso kini sa iyang pagtuon ug hilomon nga tipo sa pagkatinun-an.

Ang social media makahatag og dali nga kasayoran ug tambok nga tinubdan sa kasayoran apan bantayanan kini alang sa pagsuta ug pag-ila sa ka tinuod sa kasayoran nga gibalita.

Sigun sa bag-o lang nga pagtuon, 51 porsiyento sa mga tawo nga gipangutana nga adunay access sa social media nagsalig niini isip tinubdan sa balita. Tungod niining maong datus nagkadaghan ug misikat ang social media platforms. Apan ang pangutana, kasaligan ba isip tinubdan sa balita ang social media?

Ang tubag sa pangutana mao ang angal sa pamilya nga giingong nagpakamatay.

Si Spiderman miingon: ang dako nga gahom nagakahulogan og dako nga kaakohan (great power comes great responsibility).

Kining maong kaakohan giobserbar sa mainstream media apan wala niadtong anaa sa social media. Busa dili lang dayon tuohan ang mga balita nga mabasa sa social media gawas lang niadtong gidumala sa mga lihitimo nga journalists.

Ang mga journalists sa mainstream media gitudloan sa ilang kaakohan sa ilang kasaypanan sa pagbalita apan ang anaa sa social media wala, hinungdan magpasagad sa pagbalita.

Ang social media makahatag og dali nga balita ug tinubdan sa tambok nga kasayoran pero alang lamang kini sa dirikta nimong nakita ug dili sa nagpaluyo sa nakita nga balita.