EDITORYAL - Ang krimen ug ilegal nga drugas

Makapasubo og maayo ang gidangatan sa usa ka tinun-an sa kursong nursing sa usa ka unibersidad dinhi sa Sugbu nga nasugamak sa bayolenteng kamatayon gumikan sa krimen.

Ang kinabuhi sa 18 anyos nga babayeng tinun-an nga malinawong nagpuyo diha sa Brgy. Buaya sa Dakbayan sa Lapu-Lapu nausik lamang tungod sa binuhatan sa mga kriminal nga walay laing nahunahunaan pagbuhi sa kaugalingon kondili ang mamintaha sa uban.

Samtang tuod og dili na mabalik pa ang kinabuhi sa dalaga, ug nadakpan na sab ang suspek nga residente ra usab sa maong barangay.

Ang motibo sa pagpatay sa biktima walay klaro, kay ang suspek mismo miingon nga wala kini intension nga mopatay o patyon ang biktima kay ang iyaha rang tuyo mao ang pagpangawat unta sa balay sa biktima apan nabantayan. Tungod tingali sa kabalaka nga siya nailhan ug madakpan wala siyay pagduhaduha sa pagpusil sa biktima aron makalingkawas. Apan diay to, napatay niya ang dalaga nga adtong tungora wala gani hinagiban.

Ang maong krimen makapahinuklog og maayo para sa tanan, nga bisan si kinsa pwedeng mabiktima sa mga kriminal bisan unsang orasa ug bisan sa sulod sa kaugalingong panimalay.

Karong panahona nga dako na kaayo ang ilegal nga drugas misaka sab ang listahan sa mga krimen dili lang sa Sugbu kondili sa bisan asang suok sa Pilipinas. Mao kini ang usa sa hinungdan nganong nisaka ang mga krien.

Ang ilegal nga drugas maoy nagpakabuang aning mga adik nga wala gani ikasarang o ikapalit og ilegal nga drugas mao nga ang uban  manulis ug mangawat na aron masustentohan ang ilang dautang bisyo.

Makapamata unta kini sa katilingban, nga kun dunay ilegal nga drugas sa ilang dapit kinahanglan nila kining isumbong ngadto sa mga otoridad.

Dili na paabuton pang adunay dautang buhaton kining mga durugista nilang silingan ayha pa mosumbong. Kun magkahiusa lang ang komunidad batok ilegal nga drugas, dili kini mosanay.