Siyudad nabentahaan

Tan-aw nako, nabentahaan gyud ang Cebu City government nga itugyanan ang pagpangolekta sa parking fee sa mga tag-iya’g sakyanan nga mo-park sa mga daplin sa karsada.

Dihang reporter pa ko kaniadto, wa ko malimot nga ang koleksyon sa CITOM gikan sa mga parking fees, moabot og P38 milyones sa usa ka tuig. Tingali, mosamot pa kadako karon kay ang parking fee sa mga motor, P20 sab gihapon ang oras.

Ang usa ka parking slot nga para sa four-wheel vehicle, nga P20 ang bayad kada oras, maparkingan og pito ngadto sa walo ka motor.

Unya, kay P20 man gihapon ang pagpabayad sa mga tag-iya sa motor kon sila mo-park, aw sa ato pa, mokolekta ang Tokagawa og subra sa P100 ang oras?

Nagsugod kining Tokagawa pag-operate dinhi sa Cebu City atol sa administrasyon ni kanhi mayor Tomas Osmeña, ug hangtod karon nagpadayon.

Pagsugod niini, ang mga parking area nga ang Tokagawa maoy tigpangolekta dinhi ra sa downtown area, kay ang CITOM kaniadto mao man ang padayong nangolekta sa uptown area, apan karon sila na gyud ang mangolekta sa tibook siyudad.

Gani, duna pay mga ubang mga lugar nga wa himoa nga parking area kaniadto, nga karon gihimo na nga parking area ug ang Tokagawa gihapon maoy nangolekta.

Kon kaniadto ang Tokagawa gikontrata nga mohatag sa Cebu City government og P8.3 million kada tuig, nganong karon gipun-an ra man og gamay ug gihimo ra nga P8.7 million?

Ang koleksyon kaniadto sa CITOM gikan sa parking fees dihang mao pa kini ang nangolekta, moabot og P38 milyones, dili kini alkanse bisan pa og ibanan sa sweldo sa mga parking aides. Ang pagkwenta niini, dili iapil pag-iban ang sweldo sa mga traffic enforcers o sa tanang mga kawani sa CITOM, nga karon mao na ang Cebu City Transportation Office, kondili, ang sweldo ra sa mga parking aides.

Pagka karon hinuon, gituki na kining maong isyu sa mga sakop sa Cebu City Traffic Management Board human nako himoi og resolusyon atol sa among miting niadtong Miyerkules.

Among giawhag ang Tokagawa nga mohatag sa Traffic Board og listahan sa mga parking areas nga ilang gidumala, ug kon pila ka parking slots (motorcycles/four wheeled vehicles).

Unta, mahunahuna sa kadagkoan sa Cebu City government nga dili maayong magpadayon kining sistema nga gihatagan nga adunay makanegosyo gikan sa parking fees, apan dili tukma ang pagbahinay sa makolekta nga kantidad.

Daghan ang nagtuo nga adunay mga opisyal nga nagsilbing mga protektor niining maong transaksyon.