EDITORYAL - Gangs sa mga tunghaan

Karon nabalik na ang face to face classes sa mga tunghaan, nabalik na sab ang mga karaang paggrupo-grupo sa mga kabataan ilabi na sa mga tinun-an.

Normal lamang nga dunay mga pundok nga apilan ang mga tinun-an kay kabahin kini sa ilang paglambo sa ilang pagkatawo. Anhi nila makat-onan ang mga butang nga dili nila makita sa ilang mga panimalay.

Dinhi makakaplag ang uban og karera nga ilang taakon. Apan subo lang nga dili tanang grupo nga naa sa gawas sa panimalay makaayo para sa mga kabataan.

Ang uban inay nga makaayo, magdala na hinuon kanila sa kadautan ug kaparutan ug mamahimong walay mga hinungdan sa katilingban.

Ang mga otoridad ug kadagkoan sa mga tunghaan padayong nakigkombate sa paghunong sa impluwensiya aning mga ngil-ad ug mga walay ayong mga grupo o mas naila sa tawag nga gangs.

Kining maong mga grupo sa mga sagoy ug badlungon sagad nakopya nila gikan sa ilang mga nakita sa telebisyon ug karon sa internet.

Sila kadtong mga walay tarong nga paggiya gikan mismo sa ilang mga panimalay ilabi na sa ilang mga ginikanan. Mga ginikanan nga kung dili busy sa panginabuhi, mga nagpasagad lang ug iresponsable.

Ang mga kabataan dali kaayong malingla sa mga ingon niini nga klase sa mga grupo. Sa kahuyang sa ilang pangidaron ug kuwang sa pagmatuto ug tambag nga dunay pagmahal gikan sa ilang panimalay, mas dali silang motuo sa mga higala diha sa gawas.

Kay diha sa gawas sa balay sila makakaplag sa ilang tan-aw naghatag og bili sa kun kinsa sila, labaw sa tanan, respeto sa ilang mga kauban sa grupo kay parehas ra sila og dagan sa hunahuna ug dali rang magkauyon. Sa laktod kuwang sila og pagtagad gikan mismo sa ilang pamilya.

Nabantayan sab nga kadaghanan aning maong mga gangs naa makita sa mga public schools diin naa ang mga tinun-ang gikan sa mga kabus nga pamilya. Tungod sab sa kawad-on ug kawalay direksyon mas gipili nila ang ilang gangs  bisan og makalapas na sila sa balaod.

Dako og papel ang mga social workers , mga youth organizations sama sa Sangguniang Kabataan sa mga barangay paggiya sa ilang mga konstituwenteng kabataan aron sila mamahimong responsible unyang molupyo sa nasud.